admin
Nkosilathi Sibanda
AMAQEMBU enguqu alomkhuba omubi wokuncindezela abadlali emalini azayifunda ivaliwe kulisizini.
Lokhu kuvezwe yinhlanganiso yeFootballers Union of Zimbabwe.Inhlanganiso le ekhangelane lezempilakahle yabadlali ibike ukuba izaqala ukudonsela amathimu kungatsha zomthetho nxa eqhubeka ngokukhangelela phansi umsebenzi wabadlali.
I-FUZ ithe sekusegcekeni ukuthi kulenkokheli ezidelela inhlanganiso yabo, okuyikho okuzakwenza labo babophe imithetho ukuze abadlali bakhululeke.
UDesmond Maringwa, umgcinisihlalo weFUZ utshele uMthunywa kuliviki ukuba amathimu wonke akuleli asetsheliwe ukuthi atshiyane lokusebenzisa abadlali njengezigqili.
I-FUZ ikhuluma kanje ngesikhathi amathimu ephezulu kokuqedisa ukuthengwa lokuthengiswa kwabadlali kulisizini.
UMaringwa ubike ukuthi inhlanganiso yabo ikubeka mgceke ukuthi nxa iqembu lingenza isivumelwano lomdlali kumele libone ukuthi liyasigcwalisa leso sivumelwano.
“Sikhuze amathimu la aqinisa amakhanda ngokuncindezela abadlali. I-FUZ ilenqwaba zezikhalazo zabadlali abancitshwa imali. Sikhathazekile kulandela ukungabhadalwa kwabadlali ngamaqembu amanengi akuPremier Soccer League (PSL) kuleli.
“Sikubeka mgceke ukuthi nxa amalunga amabili enze isinqumo kumele asihloniphe leso sinqumo. Nxa kulobunzima sikhangelele ukuthi amalunga lawo womabili akhulumisane sobala, kulandela okulotshwe kuleso sinqumo,” kutsho uMaringwa.
Kuzwakale ukuthi inhlanganiso ye-FUZ isisebenzelana logatsha lukaHulumende olubona ngezisebenzi. Abadlali labo bakhuthazwe ukuthi kumele balandele indlela ezibekiweyo nxa bekhalala umsebenzi ukuze lomthetho ubavikele.
Online Reporter