admin
Nkosilathi Sibanda
NGEMVA kweviki isizwe sijabula ngokuphumelela ukuya kumkhankaso wenkezo yeAfcon ka2017, amaWarriors angena umango esiya eNamibia ukuya kwengeza ubungcitshi kumqhugelwano weCosafa oqala ngempelaviki.
Imidlalo yenkezo yeCosafa izaqhutshwa kusukela mhlaka 11 kusiya fika umhlaka 25 kulinyanga. AmaWarriors avula umncintiswano edlala lesizwe seSwaziland ngoMgqibelo. Inkezo le idlalelwa ngamazwe akuzwekazi eliseZansi yeAfrica.
Umqeqetshi uCallisto Pasuwa usekhethe iqembu azahamba lalo kweleNamibia phakathi kwabadlali ayebalolonga kumaviki amabili adluleyo. Ithimu ezakuya kuCosafa yehlukene laleyo eyangenisa isizwe kuAfcon ka2017.
IZimbabwe ibizwa njengentshantshu yomncintiswano weCosafa ngoba isiphakamise inkezo le kane lokhe yasungulwa ngomnyaka ka2010.
Kulimpelaviki abasekeli bamaWarriors balakho ukuhlekela esikhewini futhi nxa ithimu ekhethwe nguPasuwa ingenelisa ukuthi inqobe iSwaziland.
Ekulotshweni kwaloludaba, ihofisi yembiko yeZifa ithe abadlali bazasuka belubhekise eNamibia lamuhla.
Imidlalo yeCosafa le yiyo emise ukudlalwa kweminye imidlalo yeligi yeCastle.
Ngesikhathi uMthunywa edingisisa ngamalungiselelo eqembu ngoLwesithathu, isikhulumi seNational Football Association of Zimbabwe (Nfaz) uXolisani Gwesela uthe abadlali balomqeqetshi wabo enkundleni.
“Umqeqetshi usekhethe abadlali abazadlala kumncintiswano weCosafa. Njengoba kusaziwa, amaWarriors ahlezi eyithimu ehlonitshwayo kulinkezo. Silethemba lokuthi bazadlala kuhle,” nguGwesela lo.
Nansi ke ithimu yeCosafa ekhangelelweyo:
Onozinti: Tatenda Mukuruva, Donovan Bernard.
Imvimbi: Bruce Kangwa, Lawrence Mhlanga, Blessing Moyo, Ronald Pfumbidzai, Teenage Hadebe, Elisha Muroiwa, Hardlife Zvirekwi.
Esisuswini: Danny Phiri, Nqobizitha Masuku, Farai Madhananga, Talent Chawapiwa, Tafadzwa Kutinyu, Marshall Mudehwe, Raphael Manuvire, King Nadolo.
Abagadli: Obadiah, Tarumbwa, Charlton Mashumba.
Online Reporter