admin
Abakithi abamfuni engithandana laye
KHULU ngiyakubingelela ngegama leNkosi ngithi philani kulo lami ngiphila kulo. Khulu ngilomuntu ebengifuna ukumthatha manje abakithi bathi hayi abamfuni, inkinga yiyo leyi Khulu. Bathi kahloniphi. Mina ngasengithume umuntu kibo njalo sebekwazi ukuthi kulomuntu obuyayo. Mina kangisakwazi ukuthi ngenzeni Khulu, ngicela ungibonise muntomdala. Mina sengiphelelwe ngoba okwaliwa ngabazali bami yinto ekhona, lami angisamfuni phansi kwami.
Impendulo
Ngiphilile mzukulu wami. Ngalokhu okubethe phezulu kutshengisa ukuthi indlubu isizikhuphile ekhasini. Lumuntu ubonisile ukuba ungumhlobo ongalindwa nhlanyelo kungakho-ke lawe kuhle ukuba utshiyane laye kulokuba ube uzimotshela isikhathi sakho. Esintwini kakukuhlanga ukuba owesifazane aziwe yiwo wonke amadoda. Pho wena uzaziqhaja uthini ngomuntu owaziwa ngumhlaba wonke? Njengoba ukubeka kuhle ukuba kawusamfuni kuhle ukuba umlande futhi umtshele ngomlomo wakho ukuba umuzi obufuna ukuwakha kawusaphumeleli njalo zikhona izenzo ezizele lokho. Kubi ukuhlala lomuntu wena ukwazi ukuba imizwa yakho kayikho kuye.
Kangisenelisi ukukhuluma loba kuyini emzini wami
KUNJANI Khulu? Ngiyindoda eleminyaka engu-44 yokuzalwa ngilonkosikazi labantwana abahlanu. Ngihlala endlini yethu ekhonapha koNtuthu lemuli yami lanxa nje kulezinsuku ngingasebenzi. Umkami uyahamba esiyawoda kwamanye amazwe ezothengisa ukuze siphile. Uhlupho nantu Khulu, mina kangisenelisi ukukhuluma loba kuyini emzini wami njengomuntu ogciniweyo. Okunye okungihluphayo yikuthi nxa ephuma elizweni ukuba yindoda kwami konke kuhle kuphele. Khulu angaze ayehlala inyanga yonke lami ngiyazihlalela. Kodwa angavele aphenduke lami ubudoda bami buhle buphenduke. Khulu sengilomkhumbulo wokuthi ngalungiswa ukuze nxa engekho ngingabi yindoda. Pho angafa ngizenza njani? Lokhu kungabe kusitsho ukuthi kangisoze ngenelise ukuhlangana lomunye umfazi? Nginceda Khulu.
Impendulo
Ngiphilile mzukulu, indlela obeka ngayo uhlupho lwakho ibonisa ukuba lawe kawuzibambanga phela. Wawuzama ukwenzani uze ubone ukuba inhloka kaligamuli nxa umama ephume phandle ngomsebenzi? Ukuzibamba yiyo impilo mzukulu hatshi ukuba lamehlomehlo. Kuyazikhanyela ukuba wena ubotshiwe ukuba ungasali unikeza abanye uluju lukamama yena ngesikhathi eyesebenzela imuli yenu. Uhlupho olalo khathesi yikuthi uzaqala ngaphi ukubuza njalo uthi wawusenzani uze ubone ukuba amagetsi asala ewile nxa umama engekho. Kuhle ukuba ubone okhulu bakulungisele imbiza yabobaba, ezagezisa konke okukubophayo. Lokhu kodwa akukuphi ilungelelo lokuhamba uholisa abantu izinto zikankosikazi wakho. Kudaba lwakho lokungenziwa ubaba endlini, lawe phuma phandle njengamanye amadoda udinge okungaphilisa imuli yakho kulo kulindela umfazi ukuthi akuphathele konke nje wena uhlezi.
Online Reporter