admin
Buhlebenkosi Gaule
ABALIMI beMatabeleland bathabe bamanzi te kulandela isivumelwano abasenze le-Agriculture Rural Development Authority (Arda), Development Trust of Zimbabwe kanye leSchweppes nanko phela sekuzakuba lula ukuthengisa amatamatisi abo.
Kubikwa iArda, Development Trust of Zimbabwe kanye leSchweppes sebezathenga amatamatisi abalimi laba ngenhloso yokuwathengisa esefakwe emagabheni.
UMnumzana Basil Nyabadza onguMgcinisihlalo weAgriculture Rural Development Authority (Arda) uchaze ukuba kuzaqhutshwa imihlangano endaweni ezehlukeneyo kufundiswa abalimi besabelweni seMatabeleland ngemihlobo yamatamatisi okumele bawalime kanye langendlela okumele alinywe ngawo.
Iphephandaba likazulu lixhumane labanye abalimi beSigodini abachaze ukuba sebezimisele ukuqala ibhizimusi yamatamatisi ngoba isikhona inkampani esifuna ukuthenga amatamatisi ngobunengi bawo.
Omunye wabalimi uMnumzana Nicodemus Maseko uchaze ukuba ukuvulwa kwenkampani yamatamatisi kuzabanceda kakhulu esigabeni seSigodini.
“Thina abalimi beSigodini sithabile kakhulu ngokuzwa ukuba kulenkampani yamatamatisi ezaqala edinga ukuba thina njengabalimi silime amatamatisi azathengwa yileyo nkampani, lokhu kuzasinceda thina njengabalimi ngoba sizalima amatamatisi sisazi ukuba azathengwa ngoba ayabe eselindelwe,” kutsho uMnu Maseko.
UMnumzana Judia Ncube onguAgritex Officer eMatabeleland South uveze ukuthi inani elincane labathengi bamatamatisi belisenza abalimi behluleke ukulima amatamatisi amanengi ngoba besesaba ukuba azabola.
“Leli lithuba elihle kubalimi abazaphatheka kuloluhlelo ngoba inkampani le ezavulwa izakwenza kubelula ngoba abalimi bezalima besazi ukuba bazathola inzuzo masinya ngoba kulamankampani alindele ukuthenga amatamatisi abo,” kuphetha uMnu Ncube.
Online Reporter