admin
Ethel Ncube
NGENXA yothando lwenyama kulendoda yeChipale, eBinga esele ilezikhewu ngemva kokukhahlewa ngenye besembuyisweni kubangwa inyama.
‘
Indaba le yenzakale ngeviki ephelileyo lapho uJoel Sibanda ekhahlele uSivelaphi Siziba wakhumuka amazinyo ubangwa ukuba udobheleni inyama engasiyakhe.
Ekhuluma lentatheli omunye wezakhamizi obekhona kusenzakala lokhu uMnumzana Mphathi Ndlovu uveze ukuba lokhu kwenzakala impela abantu basala bengazi ukuthi babheke kuphi sebeyangiswa ngamadoda akhumulene amazinyo ngenxa yogazana.
“Sasisembuyisweni sinatha utshwala kwalethwa imiganu yenyama ukuze abantu badle, kukhanya uSiziba wacina edobha inyama emganwini ongasi wakhe umnikazi wathi ephenduka wafica inyama yakhe isingasekho okwamenza wazonda wagana unwabu.
‘’Saqala sicabanga ukuthi uyazidlalela nje kukanti hatshi sabona esekhahlela uSiziba ebusweni amazinyo athi wolokohlo phansi siwakhangele, sonke sasala simangele,’’ kubika uMnu Ndlovu.
Iphephandaba likazulu liphinde laxhumana lonkosazana Sibonakele Dube obike ukuba wamangala ukuthi amadoda amadala sengaze abange ukudla embuthanweni ohloniphekayo.
“Inyama yombuyiso le yasenzela okunye yatshiya esinye isakhamuzi singasela mazinyo. Owakhunyulwa amazinyo wadobha inyama emganwini engazi ukuba isilomnikazi wezwa ngenyathela emloyeni engakayidli okuyangaphi amazinyo ahle akhumuka wahamba esewathwele ngezandla,” kuchaza uNkszn Dube.
Ekhuluma lentatheli uMnumzana Sivelaphi Siziba owakhumuka amazinyo uveze ukuba kuliqiniso ukuba walahlekelwa ngamazinyo.
‘’Umuntu wangisukela wangikhahlela ngoba ethi ngithethe inyama yakhe ngalahlekelwa ngamazinyo amane.
Mina inyama ngayidobha nje ngisithi mhlawumbe ngumganu oseleyo ongelamnikazi kanti angibuzanga elangeni.
“Ngaba lamahloni sengiwabutha phansi amazinyo ami amane ngapha umlomo uvuza igazi, ngaphanga ngalubhekisa ngekhaya nanko phela ngasengiyangekile okuzwayo sokungathi ngisiyisihwaba kukanti hatshi bengizidlela inyama,” kutsho Siziba.
Intatheli ixhumane loJoel Sibanda onguye owatshaya omunye obike ukuba kalulanduli udaba lolu.
“Ngamkhahlela ngempazamo hatshi ukuthi ngiyisihwaba kodwa kwaphazamiseka ngoba lami ngasengiphandliwe,” kuphetha Sibanda.
Online Reporter