adminOphezulu Stinta
IYAQHUBEKA njalo logwalo lwethu, siqhubeka ngogwalo lwethu. Lapha ke yikho esihlangana khona lembali kaSolakele ngaphambilini kokuthi atshade loNyembezi.
USolakele kucaca wayesekhulile njalo laye esedakekile yikuhlala ngekhaya ebukele osowabo besiya kwenda.
Kukhanya yena wayezithandela uMlahlwa lo ngenhliziyo yakhe yonke kodwa abangakibo bengahambelani lokuthandana kwabo.
UMlahlwa sesike saxoxa kabanzi ngesimilo sakhe emuva okuyikho njalo esithemba ukuthi kwakuyisizatho esimqoka esasisenza abakwabo bangamkhwabithi uMlahlwa lo owayeyisigebengu njalo eyinswela boya yokucina.
USolakele uzithola ephakathi komjibila ongathukululekiyo, kwakunzima ukuthi aphikisane labazali bakhe, ngapha uMlahlwa lo emthanda okwamagama, dukuduku kwafika uNyembezi waduma laye njalo.
Wayesephethe mambande ngempela, amambande angaxazululekiyo.
Yena ke wayezitshele ukuthi wayezazithela ngaqandayo ngakuMlahlwa ngapha, laye azibonele ukuthi, wayengasamthandi, kambe wayezatshaya amathambo yini ukuthi wayengasathandwa kulapho ke uSolakele enza khona ubuwula obukhulu, ngoba isithembiso ngakuMlahlwa ngale sasilokhu sime mpo, singephulwanga ngitsho.
Aluba nje wenza ukuhlakanipha wahle waphumela egcekeni ngakuMlahlwa, laye wazi ukuthi wayesephumile kuye. Wayeqambe etshilo ke ngoba umgoli kawubalekelwa ngaleyondlela.
Online Reporter