admin
Ethel Ncube
KULEJAHA lesigabeni seSingeni eLupane elizagebha igodi lifunge ukuthi ngeke liphinde libange intombi kulandela ukukhitshwa amazinyo amabili ngelinye ijaha.
Kubikwa ngoLwesine kuviki ephelileyo uMeluleki Nkiwane wabona unyawo lukaMpiyelizwe Dlomo phambi kwexhiba lentombi yakhe okwabangela ukuthi alulandele waze wayawela koDlomo.
Intatheli izwe ukuthi uNkiwane efika kulowomuzi kazange athande ukuphozisa amaseko kodwa wahle wahlasela uDlomo okwabangela ukuthi asale selesikhewu.
UMthunywa uxhumane loMnumzana Mlamuli Moyo oveze ukuthi amajaha la abhuqana kwaba luthuli.
“Mina ngathola ababili laba bebhuqana ngezibhakela ngabalamula. UDlomo owayesevuza igazi wathi ufele ukuthi kutholakale unyawo lwakhe koMhlanga lapho okukhonjwe khona uNkiwane,” kutsho uMnu Moyo.
Ekhuluma loMthunywa uMnu Nkiwane uchaze ukuthi ukulwa walwa sibili ngoba intombi yakhe kafuni layo.
“Mina ngilesimomondiya sami uSitholakele Mhlanga ngathi ngisiyambona ngakibo ngathola ithenisi likaDlomo lisuka khonapho ngalilandela ngayafika ngakibo ngabuza lebantwini ngazithulela ngalinda lapho engizamthola khona,” kubika uMnu Nkiwane.
Uqhubekele phambili echaza ukuthi okwamzondisa kakhulu yikuthi isicathulo sasidingani exhibeni lentombi yakhe.
“Mina ngamlindela evela thinta inkomo ngambuza ukuthi ithenisi lakhe belisiyadingani ngakibo kwetshatshazi lami wehluleka ukungiphendula sahle sasukelana ngezibhakela.
“Okunye okwangithukuthelisa ngamandla yikuthi intombi yami layo ngathi ngiyibuza yalandula kodwa mina unyawo ngilubona,” kutsho uMnu Nkiwane.
Intatheli ixhumane lalowo owakhutshwa amazinyo oveze ukuthi balwa loDlomo bebanga intombi.
“Mina wangisukela ngempama esihlathini ngambuza ukuthi kutheni wathi ngikhombise intombi yakhe ngamphendula ukuthi akulanto enjalo. Yikho lami ngaqala ukumbisela wacina engilimaza ngalahlekelwa ngamazinyo amabili aphambili,” kutsho uMnu Dlomo.
Ebuzwa yintatheli ukuthi liqiniso na ukuthi wafika exhibeni likaSibonile ulandule.
“Ukuhamba ngahamba kodwa angizange ngingene exhibeni lentombi kaNkiwane njalo angizange ngiyikhombise, lokho akucabangelayo kayisilo qiniso.
“Okusalayo mina angibhodlanga ngizayilanda intombi yakhe ingavuma uzabe sengitshayela indaba engiyaziyo kulokufela amafufu njengegundwane. Engikufisayo yikuthi athi esebuya okwesibili ezokulwa lami ngibe sengiyitholile inkazana yakhe,” kubika uMnu Dlomo.
Iphephandaba likazulu libikelwe ukuthi kukhona okutshaya amanzi phakathi kukaMhlanga loDlomo yikho nje kwaze kwayabanjwa ithenisi lakhe libhale koMhlanga.
Ekhuluma lentatheli uNkosazana Mhlanga ulandule ukuthi uDlomo wafika kuye.
“Mina kangizange ngimbone ngezwa ngemva kokulwa ukuthi bebebanga mina. Akulabuhlobo engilabo loDlomo okukhulunywa ngabantu ukuthi ngithandana laye akusiqiniso,” kubika uNkszn Mhlanga.
UMthunywa uxhumane losobhuku wakule indawo uMnumzana Sibangilizwe Masina obike ukuthi yafika endlebeni zakhe indaba le.
“Lindaba yabafana laba ababebanga inkazana ngabahlawulisa imbuzi eyokudelela umnikazimuzi uMhlanga ngathi baxolelane baxolisana,” kuphetha uSobhuku uMasina.
Online Reporter