admin
YiNtatheli kaMthunywa
ISUNDUZA Dance Theatre isiqoqe umbukiso womdlalo obizwa ngokuthi Voices from the rocks — the story of the Matopos, othathelwe kugwalo lwesikhwicamfundo uTerrence Ranger.
Umdlalo lo ukhangelelwe ukubukiswa enkundleni yeBulawayo Theatre kusukela mhlaka 19 Nhlolanja kusiya ku-21 ngenyanga efanayo.
Kulumdlalo iSunduza Dance Theatre iyethula udaba lokwabiwa komhlabathi, ukulondolozwa kwemvelo lodlame, okuyikho okusegudwini kumazwe amanengi.
Umdlalo lo uthole usekelo kubacindezeli be-theatre abakhokhelwa nguPhillip Weiss ohlala eNgilandi.
Ukubukiswa komdlalo lo sekuvuselele iqembu leSunduza, lona elake ladla ubhedu ngeminyaka yama-1990s lisakhokhelwa ngumuyi uSimon Banda.
Ugwalo lukaRanger lolu lwabukiswa okwakuqala nguBanda kanye losaziwayo kwezokuzithokozisa umuyi uMandla Sibanda.
Umqondisi weSunduza, uCharles Banda, okunguye osevuse iqembu, ubikele uMthunywa ukuba sebekhuthalela ukuhlanganisa umculo lezemidlalo ebukiswayo ngoba iqembu labo selihlose ukubamba zonke inhlelo zokuthokozisa uzulu.
“ISunduza Dance Company isiphendukile lombukiso wogwalo lukaTerrence Ranger iVoices from the Rocks — the story of Matopos. Lapha sikhethe ukutshengisa okumunyethwe kugwalo lukaRanger ukwenzela ukuthi simemethekise ezamasiko, ukulondolozwa kwemvelo lezomhlabathi,” kutsho uBanda.
UWeiss ubike ukuba kuyamthokozisa ukuthi iSunduza Dance Company isikhethe ukuthi ibukise okumunyethwe kugwalo lolu.
“Okunje angazi ukuthi ngingakuchaza njani. Kuyangijabulisa ukubona abasakhulayo bethapha ulwazi kungwalo zabalobi. Kutshengisa ukuthi ikusasa livulekile kwezokugcinwa lokuhluzwa kwempilo yalamhlanje.”
Iqembu leSunduza okwamanje lenza umsebenzi walo lisenkundleni yePumula Open Air Arena.
Ngomnyaka ka2013, iSunduza Dance Theatre ibukise imisebenzi yayo kumkhosi weArterial Network eCapeTown.
Lonyaka ikhangelelwe ukuya kumbukiso wezokuzithokozisa edolobheni leKampala eUganda.
Online Reporter