admin
Cornelius Luphahla
IQEMBU likanobhutshuzwayo wamantombazana AmaZwangendaba Queens Football Club elidabuka eLupane lithi selihlome laphelela kwezenguqu ukuba lingene kuligi ka Division 1.
Lokhu kuvezwe ngumqeqetshi waleliqembu uMpilo Moyo emdlalweni obuphakathi kweHighlanders Royal Queens FC lamaZwangendaba Royal Queens FC ngoMgqibelo kuviki ephelileyo emagumeni eZwangendaba eLupane.
Iqembu lamaZwangendaba lisungulwe kumnyaka ophelileyo njalo selipheke abadlali abambalwa asebedlalela amanye amaqembu akuDivision 1 yikho selibona kungcono ukuthi lizimele lodwa.
Umqeqetshi waleliqembu uMpilo Moyo uthe bakhangelele ukungena kuligi kumnyaka ozayo ngenhloso yokuthuthukisa intsha kanye lesigaba.
“Njengeqembu sizimisele ukuthi kumnyaka ozayo singene kuligi kaDivision 1 ukuze sithuthukise intsha yamantombazana sibuye njalo siveze iziphiwo ezitholakala emaphandleni. Ngitsho ngoba sesenelise ukuqeqetsha abadlali asebedlalela amanye amaqembu amakhulu afana leHwange.
“Okwakhathesi siyazithembiza njalo ukuthi sizenza umsebenzi obukekayo kakhulu ngoba sesike sazihlola izinga esikulo ngokudlala lamanye amaqembu enguqu yamantombazana anjenge Highlanders Queens FC. Emidlalweni yethu esesiyidlale lamaqembu akuligi kuyatshengisa ukuthi amasango okungena kuligi avulekile. Ngalokhu sibonga kakhulu iBosso ngokuzimisela ukusilanda,” kutsho uMoyo.
Umgcinisikhwama waleliqembu uBekezela Ndlovu uthe okwenza baphuza ukungena kuligi yikuswela imali njalo abalabancedisi ababasiza ngokuthuthukisa iqembu.
“Ngesifiso sethu sasifuna ukungena kuligi lonyaka ngoba ekuqaleni komnyaka manje saswela imali yokuthi singene kanye leyendleko zeqembu. Ngalokhu-ke noma sizimisele ukungena kuligi kumnyaka ozayo sisacela uncedo ukuze senelise ukuthuthukisa iqembu lethu kanye lokuthenga ikhithi, amabhola kanye lezinye impahla ezifuneka eqenjini,” kutsho uNdlovu.
UTawanda Muterwa ongomunye wabaholi baleliqembu uthe bakhangelele njalo ukungenisa leqembu labo lamajaha kuligi kaDivision 2.
“Okunye njalo sikhangelele ukuthi singangenisa iqembu likanobhutshuzwayo wamantombazana kuligi ngokuya kwesikhathi singenise lelamajaha esilalo iSt Luke’s Hot Spurs kuligi kaDivision 2. Ngitsho ngoba lalo sesilipheke lavuthwa sibili nanku like ladlala leleHighlanders FC latshengisa ukusebenza gadalala,” kutsho uMuterwa.
UPromise Moyo oyisakhamuzi sakule indawo uthe bayajabula kakhulu ngoba amaqembu athuthukisa isigaba kanye lentsha.
“Thina njengezakhamizi siyajabula kakhulu ngesenzo esenziwe nguMoyo umqeqetshi waleliqembu encediswa yisikolo seZwangendaba. Lokhu kuyasithuthukisa kakhulu ngoba abantwabethu abaleziphiwo zokudlala inguqu abanye babo sebesenelisa ukuziphilisa ngcono njengoba sebedlalela amanye amaqembu.
“Okunye njalo iqembu leli lingangena kuligi kuzaba yinto enhle kakhulu ngoba abantwabethu bazathuthuka kanye lesigaba ngenxa yomdlalo kanobhutshuzwayo. Lokhu kwenza siziqhenye ngomqeqetshi waleliqembu kanye langenkokheli zesikolo seZwangendaba,” kuphetha uMoyo.
Online Reporter