admin
YiNtatheli kaMthunywa
INHLANGANISO yeHockey Association of Zimbabwe (HAZ) kubikwa iphakathi kwamalungiselelo okuqoqa umncintiswano omkhulu ozadibanisa amathimu akuleli enkundleni yeKhumalo koBulawayo.
Umbiko ophuma kulinhlanganiso wazisa ukuba ngomnyaka ozayo kuhlelwe ukuba kudlalelwe imincintiswano eminengi enkundleni yakoNtuthu le.
Kubikwa imincintiswano le izadibanisa amathimu asacathula kanye lalawo aziwayo kuleli laphuma kwamanye amazwe.
Umbiko lo okhitshwe ngabafakazi abaqotho ngemva komhlangano webhodi yenkokheli ezintsha zomdlalo we-hockey uchaza njalo ukuthi ngethemu lakuqala lokuvulwa kwezikolo, inhlanganiso le izasebenzelana lezikolo ekuthuthukiseni umdlalo.
“Ikhona imincintiswano ezabuya koBulawayo. Sincoma indlela inkundla yeKhumalo egcinwe ngayo ngakho kungumlandu wethu ukuthi siphakamise imidlalo yonke kulindawo,” kutsho iHAZ.
Kusenjalo, iqembu lesizwe lama-Under 21 seliphakamise isisindo samalungiselelo emidlalo yenkezo yeWomen Hockey Junior Championship ezweni leChile. IZimbabwe ingena kulinkezo ngemva kweminyaka elitshumi lanye.
Amantombazana esizwe azadlala kuqula elilamazwe abalisa iMelika, iKorea leNetherlands.
Amanye amaqembu yiSouth Africa, iFrance, iGermany, Japan, iChile, iEngland leAustralia.
Kubikwa umqeqetshi uPatricia Davies uzizwa echelesile ngokuqina kwabadlali bakhe.
IHockey Association of Zimbabwe kumbiko wayo ewuthumele uMthunywa ebulenjini, ibika ukuthi iqembu lamantombazana lidlale okobungane lesizwe seSouth Africa kwaphetha kungutshiki lobhanqa.
“Silungiselele kuhle ukuqala ukuncintisa kuJunior World Cup le. Sidlale leSouth Africa kumdlalo esibona angathi usenze sabona amaphutha ethu. Sesilinde ukuncintisa.”
Ukuphumelela kwamantombazana alumdlalo sekubatshazwe yinhlanganiso ye-hockey kuleli ebike ukuba sekusele ukuthi iZimbabwe iyencintisa njalo kumbuthano wama-Olympics.
Online Reporter