admin
YiNtatheli kaMthunywa
NGESONTO akusalimuntu kusiyabukelwa imidlalo yokucina kusizini yeCastle Lager yalonyaka.
Kuzakuba nzima ukuthi iHighlanders idlule lula kuqembu lezimbamgodi zamalahle iHwange FC, nanko sekuqale umkhankaso kunkamba yeChipangano wokuvala isizini ngokudla iTshilamoya ngendlela engakaze ibonakale kumbali yamathimu womabili.
NgoMabasa, amaqembu la adibana kumdlalo wokuvula isizini lapho iHighlanders eyabhaxabula iHwange nge-3-0 eColliery. Yiwo lumdlalo ozwisa abafana beChipangano ubuhlungu, owenza njalo bafungele ukucobodisa iTshilamoya egumeni layo leBarbourfields ngeSonto.
IHwange igiya ngoluphezulu kulezinsuku kulandela ukusinda kwayo ekuxotshweni kuligi yePSL lonyaka. Kuphose kwaba lesililo edolobheni lamalahle sekungathi leliqembu lizavalelisa ukuncintisa emalini. Ukusila kwalithimu kumbe yinhlanhla ngoba lalawo ayilandela phansi atshiyane layo ngemiklomelo emilutshwane.
Okuzakhweza idlabuzane leHwange yikubakhona kwembabazane yomgadli uGift Mbweti, osevele watsho ukuthi iHighlanders izoyidela inkani kuye.
Kunkamba yeHighlanders, ukuzwa ngokufunga kweHwange kungahle kutshayise abadlali ngovalo ngoba leliqembu livela nqotshwa kabuhlungu yiFC Platinum, 3-1, okubengumdlalo okhiphe “isinkwa” emlonyeni wabadlali. IBosso angeke yabalethuba lokuyiphakamisa inkezo yeCastle Lager.
UMthunywa ubelethuba lokuthi abukele iHwange ilolonga ngoLwesithathu emini enkundleni yeColliery. Loba abadlali bebezilola ngokujwayela kwabo, bekusobala ukuthi umdlalo wabo leBosso bawuqakathekisa okuzwayo.
UMebelo Njekwa umqeqetshi weHwange uthe kubalulekile ukuhluthuna imiklomelo yomithathu kumdlalo wokucina.
“Singabe sesisinde ukuphuma kuligi kodwa umsebenzi awukapheli. Kumele siyitshaye iHighlanders, sitshengise ukuthi asilabuhlobo layo.’’
Umqeqetshi lo, ubesolwa ngabalandeli beChipangano abakhwaze isizini yonke bekhonona ngokwehluleka kwakhe ukuvusa lithimu.
UMbweti, okhulume ngamafitshane mayelana lomdlalo wokucina lo, utshele intatheli kaMthunywa ukuthi ufuna ukubukisa ukudla kwamehlo phambili kwabalandeli beBosso.
“Ngizadlala njengokutshelwa ngumqeqetshi wami,’’ kutsho lumdlali.
Online Reporter