admin
Igula elidala livame ukunuka amasi bakaMthwakazi. Lokhu kugcwaliseka ngephephandaba likazulu elidume ngendaba ezimnandi nanku njalo selize lazo njalo elidume ngazo nanku phela lize lengadlangadla yejaha elidume ngezobulingisi. Lingena kuvungame uzulu lelijaha.
Kambe kungaba ngubani umdlali onandisa kangaka ngaphandle kukaMthulisi Moyo ijaha elidabuka koSigola eMzingwane. Kwezobulingisi angithi lelijaha lidume ngokuthi nguMahlalela. Othanda ukuzwa ngale indoda kabale lingxoxo enambithekayo phakathi kukaCornelius Luphahla (CL) intatheli yephephandaba likazulu lalelijaha uMthulisi Moyo (MM).
CL: MfokaMoyo umphakathi uthanda ukwazi ukuthi ngubani uMthulisi Moyo njalo waqala nini ezobulingisi?
MM: Mina ngidabuka esigabeni sakoSigola eMzingwane lapho engakhulela khona ngabuya njalo ngafunda khona ngaze ngayaqeda uFomu 4. Ezokuthokozisa uzulu ngaziqala ngisafunda eSigola Primary lapho engangiphatheka khona kakhulu emidlalweni yobulingisi kanye lemigidweni egoqela isitshikitsha, izangoma kanye leminye imigido.
Ngaqhubeka ngokwenza imidlalo le ngaze ngayaqeda uFomu 4. Ngesikhathi sengifunda eSiphezini Secondary ngasengisenza imidlalo le ikakhulu nxa kubuye uDokotela uJoshua Nkomo ezovakatshela induna uSigola.
CL: Lokhe waqala umsebenzi wobulingisi sowakhipha amadlalade amangaki mfokaMoyo?
MM: Njengomdlali wokulingisa sengakhipha amadlalade emidlalo amabili. Elakuqala ngalikhipha ngo2011 elomdlalo othi Phandile, ngabuya njalo ngakhipha elinye ngo 2015 elomdlalo othi Mahlalela. Umdlalo lo ngawupheka ngincedisana lomculi wodumo uFreddy Gwala kanye loKafupi.
CL: Abantu bathini ngomsebenzi wakho njalo ukhangelele ukubenzelani lonyaka?
MM: Abantu bayawuthakazelela umsebenzi wami njalo bangikhuthaza ukuthi ngiqhubekele phambili ngibajabulisa ngemidlalo yami. Ngalokhu lonyaka sengibaphekele imidlalo emibili eminandi okwamagama ezaphuma kungensuku zingaki njalo ngibathembisa ukubaqhubekela phambili ngibajabulisa.
Omunye wemidlalo le ngiwupheke ngincedisana loTshawe umdlali wobulingisi weSouth Africa.
CL: Wandise ukudlalela ngaphi imidlalo yakho njalo uzulu uthanda ukwazi ukuthi amadlalade akho atholakala ngaphi jahelibanzi?
MM: Imidlalo yami ngivame ukuyidlalela koBulawayo kanye lakwele South Africa. Amadlalade ami atholakala indawo zonke kwelakithi ikakhulu koBulawayo. Ayatholakala njalo lakwele South Africa lapho engikhona okwamanje.
CL: Ngaphandle kokuba ngumdlali kuyini njalo okwenzayo empilweni?
MM: Noma nje ngingumdlali wobulingisi okunye njalo ngiyasebenza ukuze ngithole imali yokuzithuthukisa kwezemidlalo.
CL: Bunzima bani oyake uhlangane labo njengomdlali wobulingisi njalo nkuthazo bani oyipha abaculi abasasungula?
MM: Ubunzima engiyake ngihlangane labo njengomdlali wobulingisi yikuswela imali yokuzithuthukisa kwezemidlalo njengoba kudingeka imali ikakhulu ekukhipheni idlalade. Okunye njalo yikuthi abantu basuka bantshontshe imidlalo yami bayithengise ngentengo ephansi okudala ukuthi abantu bengasathengi kimi.
Kubaculi abasasungula ngithi kabaqhubekele phambili bengadeli ezokuthokozisa uzulu noma kunzima ngoba vele umsebenzi lo unzima.
Online Reporter