admin
Yintatheli kaMthunywa
ABADLALI beqembu lenguqu Bulawayo Chiefs abasoze baginqe banukele abanye enkundleni nanko sebegcoba amakha alungiswe nguGabriel Nyoni abizwa ngokuthi yiGN27.
UNyoni ngumdlali webhola wakuleli osekuqembu leCape Umoyo eSouth Africa.
Kumalanga adluleyo uNyoni ubephethwe emlonyeni yabalandeli labathandi bendaba zenguqu, esethula umbiko wokuthi amakha alebizo lakhe la asetholakala koBulawayo.
Umdlali lo ngowokuqala ukuba lebhizimusi elinje kumbali yabadlali benguqu yakuleli.
Isikhulumi seBulawayo Chiefs uThulani “Javas” Sibanda ngoLwesithathu uthe ngaphandle kokusebenzisa amakha kaGabriel, abadlali bazaphiwa ezinye impahla ezivela kunkampani ye-GN27.
“Isivumelwano lesi sitsho ukuba iqembu lethu lizagcoba amakha eGN27. Amakha la azakuba ngawethu enkundleni laphandle,” kutsho uSibanda.
USibanda uthe bayamukele ngazo zonke izandla ubudlelwano obutsha loGabriel owayengumdlali wabo esacathula emdlalweni.
“UGabriel Nyoni ngomunye wethu ngakho kufanele ukuthi sisebenzise iGN27 ngoba ngeyakhe. I-GN27 ngamakha ayenzelwe amaNinja, thina abeBulawayo Chiefs.”
IBulawayo Chiefs yilo lodwa iqembu kuligi yePremier Soccer League ukuba lebhizimusi lokuthengisa impahla enzikini yakoBulawayo lasebulenjini.
Online Reporter