Online Reporter
Nkosilathi Sibanda
ABAQOQI bomjaho weBinga Kasambabezi Marathon babika ukuthi konke kuhamba ngendlela efaneleyo kumalungiselelo alumncintiswano ozaqhutshwa mhlaka 27 Mpandula.
Umjaho lo, osungena kumnyaka wesitshiya galombili lokhe wasungulwayo usuqakatheke kakhulu kwezokugijima kuleli njalo uphathwa njengohlelo lokuthuthukisa iBinga lezinye indawo esabelweni seMatabeleland North.
Minyaka yonke liyanda inani labagijimi abaphatheka kuwo, kusiba lentshantshu esezibuthe imendulo kweminye imijaho emikhulu kuleli. Lonyaka kukhangelelwe okufanayo.
Omunye wabaqoqi bomjaho lo, uRonald Siyamwamwata utshele iphephandaba likazulu ukuthi baqhuba kakuhle amalungiselelo njalo sekubhalise abantu abanengi.
“Sikhangelele ukuthi sedlulise inani labantu abancintisa ngomnyaka odluleyo. Banengi asebebhalisa, okuyikho okunikeza ithemba lokuthi lonyaka umncintiswano uzakuba mkhulu,” kutsho uSiyamwamwata.
Ubike lokuthi umjaho lo usubambane lomunye ozaqhutshwa ngesikhathi esifanyo, edolobheni leLublin, ePoland.
USiyamwamwata uthe bahlose ukukhukhumeza umdlalo wokugijima ilizweni, bakhankasele ukuzigqaja kwezizalwane zakuleli ngokusebenzisa umdlalo wokugijima.
“Sifuna ukuthi siqinise ukuzigqaja phakathi kwezizalwane zakuleli lokuthi siphakamise intsha yakuleli ukuze ivulelwe amathuba empilo,” kutsho omunye wabaqoqi bomjaho uRonald Siyamwamwata.
Abagijimi bazancintisana ku-42km, 21km, 10km le5km. Kubikwa kuzaba lemincintiswano yamabhayisikili owe-50km le-10km yama-wheelchair. KwelePolanda, uSiyamwamwata uthe kuzancintiswa i-12km.
Ngaphandle kokugijima, kuzaqhutshwa njalo lomkhosi weBaTonga Cultural Festival ngasikhathi sinye.
Kukhangelelwe ukuthi ukugijime abantu abedlula i-2 000 eBinga.
