Topola, Topala iDynamos

Nkosilathi Sibanda, esenkundleni yeBarbourfields

Chicken Inn 3-0 Dynamos

KUCACILE ukuthi uphahla luyaphihlika egumeni Dynamos.

Ithimba laleliqembu lingene umango lisuka eHarare lisiza koBulawayo lingahlelekanga.

Lingene enkundleni yeBarbourfields lilande ukuzodlala sengathi livakatshile. Akula okungakhulunywa ngakho, ngelikuphakulule eBarbourfields ngeSonto, ngaphandle kokuthi livoxe udaka.

Ababukeli bomdlalo abaqunge isibindi behlaselwa ngumqando, bazibonele mathupha ukuthi akusela lutho kuDembare. Kusele ibizo kuphela. Lakanye iChicken Inn ikutshengisile ukuthi eyeMbare isitshabalele.

Amambule avulwe nguLynoth Chikuhwa, elithola “emsindweni” waligaxa phakathi ngonlmzuzu wesi-21. Elesibili lingeniswe nguMpumelelo Bhebhe, kwaqedisa uMichael Charamba.

Kube ngamahlandla amathathu, iDynamos ibona intuthu.

Kodwa ke, njengoba bekulindiwe, kulehlekana labalandeli beDynamos abacaphuke kakukhu, inhliziyo zabo zisebuhlungwini, abatshengisele enkundleni, bekhonona “ngokudilika” kweqembu labo.

Bebegcwele endaweni yabo eMpilo End, behlabela kodwa idlabuzane lithule zwi, lapho iqembu lihlohlwa elesibili.

Bakhalale ukubukela umdlalo, nanko ukukhuza kwabo bekungancedi, iqembu liphethe ngokugijima indawo yonke, kungaphumi lutho.

Amapholisa eZimbabwe Republic Police athwale nzima ukuthi enqabele abalandeli beDynamos ukuthi bachume.

Umqeqetshi weChicken Inn Inn uJoseph Antipas uthe:” Kuhle esukwenzile. Benze kuhle abafana, kuze ngesikhathi lapho esingakwazi ukuthi senze njani. Kujabulisa.”

Amaqembu ebemi kanje:

Chicken Inn:

Donovan Bernard (gk), Malvin Hwata (Brian Muza, 71mins), Joseph Tulani (Brendon Rendo, 60mins), Walter Vuwa, Xolani Ndlovu, Mpumelelo Bhebhe, Itai Mabhunu, George Majika, Lynoth Chikuhwa (Edward Musena, 60mins), Irvin Mukombwe, Lincoln Mangaira (Michael Charamba, 46mins)

Dynamos:

Tatenda Makoni (gk), Emmanuel Jalai, Abel Gwatidzo, Dennis Nhongo, Gumisai Mandivei, Shadreck Nyahwa, Tellmore Pio, Temptation Chiwunga (Alexander Mandinyenya, 60mins), Wisdom Mtasa (Enasio Perezo, 46mins), Frank Agyemang, Leeroy Mavunga (Valentine Kadonzvo, 60mins).