Online Reporter
Ethel Ncube
UKHOMUREDI Obert Mpofu ukhuthaze abazali ukuba bafundise abantwana indlela eziqondileyo njalo babavikele ekuhlukuluzweni kanye lokumithiswa bebancane.
UDkt Mpofu wethule amazwi la ekhuthaza uzulu ukuba abambisane kuncediswe abantwana emcimbini oqhutshwe yiZimbabwe Liberated Girl Child in Action oqhutshelwe eNyamandlovu.
“Bazali asifundiseni abantwana bahambe esikolo. Kuqakathekile lokhu ngoba kungumlandu wethu njengabazali ukubona ukuthi abantwana baba lekusasa elihle.
“Kuyadanisa ukuthola umuntu elenkomo ezinengi kodwa esehluleka khona ukuhambisa abantwana esikolo. Izikolo eMguza zikhona, sazakhela abantwana ukuba bafunde. Bazali umntwana ngumntwana angaze abenjani ngumntwana, nxa eleminyaka engaphansi kwe-18 akalungelanga ukuba ende kumbe amithiswe.
“Abantwana asibafundiseni njalo imithetho eqondileyo, ungathola umntwana ezitolo acele imali umnike kusasa njalo uzaphinda into efanayo ecela kwabanye bacine bemhlukuluza umntwana. Kumqoka-ke ukuthi sinanzelele lapho okuhamba khona abantwabethu ngoba bacina befunda umthetho ongayisiwo.
“Kungumlandu wami lawe njengabazali ukuthi sibafundise umthetho ukuze bazi okulungileyo lokungalunganga. Bantwana lani phathekani ezifundweni zenu lifunde lipase lingahawukeli izinto zamajaha, zizalihlupha kusasa.
“Qinani ngesikolo lifunde libe lekusasa elihle. Bazali abantwana abakhuzwe lani badala lingaphazamisi impilo zabantwana qinani kubomkenu hatshi ukuphambanisa ikusasa yabantwana bekeleni bafunde,” kutsho uKhmrd Mpofu.
Amazwi kaKhmrd Mpofu aza ngesikhathi kukhankaselwa ukumiswa kokwendiswa kwabantwana ikakhulu labo abasemaphandleni. Induna zezigaba ezitshiyeneyo lazo sezathatha amanyathelo okuqala izinhlelo zokulwisa ukwendiswa kwabantwana.
