Online Reporter
Ethel Ncube
KULENDODA eleminyaka engu-32 yokuzalwa yeGwanda egwetshelwe ukuyapika iminyaka engamatshumi amabili ejele ngecala lokudlwengula umntanayo oleminyaka eyisitshiyagalolunye (9).
Umsolwa esingeke sachaza igama lakhe ngenhloso yokuvikela umamangala, ohlala eGarikai, eGwanda umiswe emthethwandaba weGwanda ngeviki ephelileyo.
Umtshutshisi kulelicala uMnumzana Ngonidzashe Shumba ubikele inkundla ukuthi umsolwa waqala ukuhlukuluza umamangala ngomnyaka ka-2022, lapho abefika endlini edle amabele ebesedlwengula umntwana.
Kuzwakale njalo ukuthi umsolwa ubevele esehlala ehlukuluza umamangala nxa unina engekho.
“Kucala lakuqala ngomnyaka ka2022 umsolwa wafika endlini edakiwe ethwele ukudla komntanakhe, wamvusa wadla uthe eqeda ukudla wamhlubula impahla wamdlwengula. Wabuye wethusela umamangala ukuthi angabikeli muntu ngoba angakwenza lokhu uzamtshaya.”
Kusukela ngo2022 ubelokhu edlwengula umntanakhe, lokhu kuze kwavela sobala ngomnyaka ka2024 lapho umama womntwana acela ubabakazi ukuthi amkhulumele lomntanakhe. Kwaba yilapho ithumba elahle labhoboka khona.
Kubikwa umsolwa wahle wabotshwa kukanti umamangala wahanjiswa esibhedlela ukuze ayehlolwa.
Umsolwa umiswe phambi kukamantshi uPatience Madondo oqume ukuthi ayepika iminyaka engu-20 ejele ngoba ufuna isigwebo lesi sibe yisifundo kwabanye obaba abehluleka ukuzithiba bahlukuluze abantwababo.
