admin
Johas Moyo
ABE-Veterinary Services esabelweni seMatabeleland North sebelimukise abalimi bakule indawo ukuthi baqaphele njalo bavikele izifuyo zabo emikhuhlaneni ngoba isanda nxa izulu lisina.
UDokotela Ndabezinhle Mkhwananzi uthe njengoba izulu lisina utshani buyakhula okucina kubangela imikhuhlane etshiyeneyo ezifuyweni.
Uthe abalimi kumele babone ukuthi inkomo zabo ziyadibha ngendlela ekhangelelweyo.
“Sikhuthaza abalimi ukuthi babone ukuba bayadibhisa inkomo zabo ngemva kwamaviki amabili ukuze bazivikele kumikhaza emunya igazi iphinde ibangele izilonda. Ukuzidibhisa yiyo kuphela indlela yokulwisana lemikhaza,” kutsho uDkt Mkwananzi.
Uqhubekele phambili esithi abalimi abangenelisi ukudibhisa inkomo zabo kumele bazifafaze ngemithi.
UDkt Mkhwananzi uphinde wacebisa abalimi ukuthi bavikele inkomo zabo kunyongo.
“Abalimi kababone ukuthi inkomo ziyadozwa ngemithi yesilungu kanye leyesintu. Lokhu kuyancedisa inkomo ukuthi zihlale zivikelekile emikhuhlaneni yenyongo kanye leminye imikhuhlane etholakalayo ngalesi sikhathi sehlobo,” kutsho uDkt Mkhwananzi.
Uphethe ngokukhuthaza abalimi ukuthi bahlalise izifuyo zabo endaweni ehlanzekileyo ngoba lokhu lakho kucina kubangela imikhuhlane ezifuyweni.
“Inkomo akumelanga zihlale endaweni elodaka kumbe ubulongwe, amasondo azo aba lezilonda ezichinca igazi kungakho abalimi kababe lezibaya ezinengi ezizakwenza ukuthi inkomo zilale endaweni ehlanzekileyo ngoba lokhu kungenye indlela yokuzivikela emikhuhlaneni engazihlasela,” kutsho uDkt uMkhwananzi.
Online Reporter