admin
Msilisi Dube
AMALUNGISELELO omkhosi wokunanza usuku lwamaqhawe asesibangeni esiphezulu koBulawayo njalo uzulu wonke ovela endaweni ezitshiyeneyo zelizwe ukhuthazwa ukuba amanyane ngoba sibonga umsebenzi esawenzelwa ngamaqhawe.
Lolusuku lwamaqhawe luzananzwa ngoMvulo kuviki ezayo kuthi ngoLwesibili kuzabe kulusuku lweDefence Forces.
Ngelanga lamaqhawe abantu bakoBulawayo bazabe bebuthene eHeroes Acre kuthi koBulawayo bazabe beselokitshini leNkulumane lapho okuleProvincial Heroes Acre.
Ekhuluma loMthunywa uMinister of State for Provincial Affairs koBulawayo uKhomuredi Nomthandazo Eunice Moyo, uthe amaqhawe kumele anikezwe inhlonipho yonke njalo abatsha kumele baphatheke embuthanweni lo.
“Thina koBulawayo sizabe sibuthene eNkulumane ngakho sithanda ukunxusa abantu bonke ukuba bebuye sizojabula sisonke. Amaqhawe asitshiyayo kunye laphilayo kumele siwanikeze inhlonipho yonke ngoba yiwo asikhulula ngaphansi kombuso wabancindezeli.
“Usuku lolu luqakatheke kakhulu empilweni zabantu beZimbabwe ngoba amaqhawe ethu yiwo asikhupha embusweni wabancindezeli yikho nje sizibusa lamuhla,” kuchaza uKhmrd Moyo.
UKhmrd Moyo uqhubekele phambili wathi kuzabe kulamabhasi athwala abantu emawadini abo ebasa eNkulumane lapho okuzabe kubuthenwe khona.
Omunye umlweli wenkululeko ugogo uJane Ngwenya ukhuthaze abatsha ukuba badinge imbali yokuthathwa kukazibuse ebantwini abadala.
“Abatsha kabadinge ulwazi olujulileyo ngokuthathwa kwelizwe leli ebazalini babo ukuze bazi ngemvelaphi yelizwe lethu. Abatsha bayikusasa yelizwe leli ngakho kumele baliphathe njengeqanda ukuze lingabaphunyuki.
“Ekucineni ngithanda ukuthi akumelanga sibandlululane ngemihlobo kodwa kumele sibambane njalo sisebenze ndawonye ukuze sithuthukise isizwe sethu.
“Akumelanga njalo silahle amasiko ethu ngoba isizwe yisizwe ngamasiko aso,” kuphetha ugogo uMaNgwenya.
Online Reporter