admin
KULANDELA ukudlaliswa mahala kumincintiswano eminengi, amantombazana adlala inguqu kuleli azathola ukuthokoza ngokuzwa ukuthi inkezo yeLM Auctioneers isiphendukile.
Umqhudelwano wenguqu lo udibanisa amantombazana wodwa njalo lonyaka uqhutshwa koBulawayo, kukhangelelwe ukuthi amaqembu akuzabelo zonke zelilwe ancintisele umvuzo obiza i$3 000.
Imidlalo yalinkezo izaqhutshwa mhlaka 10 kusiya ku11Mpalakazi koBulawayo, lapho eyasungulwa khona ngomnyaka ka2011.
Njenge minyaka yonke, abaqoqi balinkezo banxuse amaqembu avela eBotswana njalo kubikwa kuzakuba lamanye amabili aweZambia laseSwaziland.
Inkezo le yiyo yodwa elesizinga esiphezulu kunguqu yamantombazana osekwenze ukuthi ihlonitshwe ngamathimu akuleli lalawo akwamanye amazwe.
Amaqembu eBotswana aseqalile ukuvumela abadlali bawo ukuthi badlale kuleli ngemva kokuza komdlalo we Double Action uBebeto Otlhagile, owafika wenza udumo engaphansi kwe-InLine Academy.
Isikhulumi sequla eliqoqa inkezo uLee Mangena uthe okuhlabusayo ngomqhudelwano walonyaka yikuthi ulemvuzo ezatshintsha impilo zabadlali.
“Isikhona inkezo yeLM Auctioneers. Yasungulwa lapha koBulawayo ngakho isiphendukile njalo. Imidlalo isike yabakhona eGweru laseMutare kuminyaka eyadlulayo.
“Njengenjwayelo sinxuse iDouble Action yaseBotswana, InLine Academy, New Orleans,Hwange, Hearts of Oak, Street Set, Flame Lily, Mufakose Queens, iBlack Rhinos lezinye,” kutsho uMangena.
UMangena wengeze ngokuthi umvuzo wokuqala i$3 000 izabe ilemendulo zegolide zabadlali, kuthi iqembu elizanqotshwa ku-final lithola i$1 000.
Umaqhuzu weLM Auctioneers uLewis Mazhara uthe ucabange ukumphendukisa inkezo le ngoba ebone ukuthi amantombazana asafuna usekelo oluzwayo kunguqu.
“Le yindlela esifuna ukhankasa ngayo ngokuqakatheka kokusekela amantombazana alethalenta lemidlalo ikakhulu kunguqu,” kutsho uMazhara ngoLwesithathu.
Online Reporter