admin
YiNtatheli kaMthunywa
UJOEY Antipas usengatshaywa ngumoya kancane kulandela umbiko wokuthi kasoze axotshwe umsebenzi wobuka ngumqeqetshi we-AmaZulu.
Kumaviki amabili adluleyo bekugcwele amahemuhemu athi uAntipas uzaphenduka masinyane eZimbabwe ngoba inkokheli ze-AmaZulu zingasuthiseki ngempumela yalithimu. Umqeqetshi lo ubesetshove imidlalo emine ithimu idliwa.
U-Antipas waphiwa umlandu wokuthi angenise Usuthu kuligi yePremiership eSouth Africa ngomnyaka ozayo.
UMthunywa ukubika ngokugcweleyo ukuthi umqeqetshi lo usaselawo umsebenzi njalo inkokheli ze-AmaZulu aziboni isizatho sokuthi zimxotshe.
NgoLwesibili emini, iphephandaba likazulu lixhumane lomaneja weAmaZulu ebulenjini uLunga Sokhela obike ukuba ithemba labo likuAntipas.
“UAntipas ulokhe engumqeqetshi wethu. Ngamanga ukuthi iqembu lethu beselidinga umqeqetshi omutsha,” kutsho uSokhela.
Imbuzo mayelana lomsebenzi kaAntipas ivele ekuthini bekubikwa ukuthi kuzaqhatshwa uVladislav Heric endaweni yakhe.
Iqembu le-AmaZulu lithumele umbiko kubalandeli balo lisithi liyamangala ngokumemetheka kokuthi selixotsha uAntipas. Kumbiko walo, leliqembu likubeke egcekeni ukuthi lokhe lisekela u-Antipas.
“Sizimisele ukukhuphukela esigabeni saphezulu iqembu lingaphansi kukaJoey Antipas.”
USuthu luqale ukunqotshwa yiFC Cape Town 2-1 ngoMfumfu, okukhona okwabayisiqalo sokuthi abalandeli bakhonone.
Ekhuluma ngaleso isikhathi uAntipas wathi: “Umumo womkhathi udale ukuthi sehluleke ukudlala kakuhle ngendlela ebesihlele ngayo. Bekungumdlalo obekumele unqotshwe yithi. Umoya ubuvunguza kakubi yikho sehluleke ukunqoba,” kwatsho uAntipas.
Ukunqotshwa lokhu kwenza i-AmaZulu yemukwa esikhundleni sobukhokheli kungalane yeNational First Division.
UAntipas usuke kuleli ngoNtulikazi elande umsebenzi omutsha ku-AmaZulu. Wasuka lomsekeli wakhe kuChicken Inn uPrince Matore. Bobabili laba bakhuza iChicken Inn yaze yathwala inkezo yeCastle Lager ngo2015.
Online Reporter