adminNcekwenhle Ncube
ABAKHOKHELI bakanobhutshuzwayo wabomama sebekhuthaze intathelizindaba kanye lozulu ukuthi basekele inguqu yabomama ikakhulu kwelakoBulawayo.
Intathelizindaba kaMthunywa ibikelwe ukuthi ibhola labomama alinikezwa ithuba elifananayo njengeminye imidlalo etholakala kwelakithi.
ULee Mangena ongumahluli wemidlalo kunguqu yabomama uchaze ukuthi iligi yabomama isingene ehlandleni lesibili kodwa balokhe besilela kubalandeli abasekela umdlalo wabo.
Uqhubekele phambili eveza ukuthi bona njengenkokheli yenguqu yabomama bafisa ukuthi ngabe uzulu uyasekela imidlalo yabo njengalokho kusenzakala emazweni esingcelelane lawo agoqela iSouth Africa leBotswana.
Iphephandaba likazulu lixhumane loThabani Tshuma ongumaqhuzu weqembu leMguza Rural yena ochaze ukuthi amaqembu amanengi abomama asilela kakhulu kumasponsor okwenza kube nzima ukuthi ikhuphuke iyephezulu.
“Nginanzelela ukuthi inguqu yabomama iswela abantu ababasekelayo. Lokhu kwenza kubenzima ukuthi azuze amasponsor okuthi asisekele ngemali,” kutsho uTshuma.
Uqhubekele phambili ekhuthaza uMthwakazi ukuthi asekele unobhutshuzwayo wabomama ebangeni eliphansi hatshi kuphela nxa sebemele ilizwe njengalokho okuvame ukwenziwa.
Intatheli kaMthunywa izwe ukuthi kwesinye isikhathi amaqembu abomama ayaswela izimali zokukhokhela onempembe ngoba bengelabo abantu ababasizayo ngesikhathi lesi easinzima kangaka.
UThembelani Dhliwayo ongumnikazi abuye abengumqeqetshi weqembu leBurrow Street Jets uchaze ukuthi okwenza kubenzima ukuthi bathole abalandeli yisikhathi imidlalo yabo edlalwa ngaso.
“Imidlalo yethu ivame ukudlalwa ngomgqibelo ngehola letshumi ekuseni. Lokhu kubangela ukuthi siswele abalandeli ngoba bayabe bebambekile emisebenzini,” kubika uDhliwayo.
“Ngikhuluma nje lemuli yami iyehluleka ukuthola ithuba lokubukela iqembu lami kungakho kuyadingaka ukuthi kuntshitshwe isikhathi sokudlala.”
Uphethe ngokuchaza ukuthi balethemba lokuthi imidlalo yabomama izaqhubekela phambili ikhula njengayo yonke imidlalo eyaqala ikhangelelwa phansi.
Online Reporter