admin
Cornelius Luphahla
ZIMADOLONZIMA izakhamizi zesigabeni sakoSigola ngemva kokuba esinye isakhamuzi sicatshelwe ngumntanaso umlisa wakule indawo wasibikela ukuthi sizambona esengamathambo kwathi umzukulu kamlisa lo wathi nguye owamthathayo.
Indaba le asansumansumane yenzakale kuviki ephelileyo lapho umlisa uMnumzana Elmon Mduduzi Dlodlo abikele uMnu Kenias Ngulube ukuthi umntanakhe owacatsha ngoMpalakazi nyakenye uzamthola sengamathambo.
Kuzwakale ukuthi ekucatsheni komntwana lo kwabizwa abaphurofethi ukuba bezodinga umntwana bathi omthetheyo uzahlanya ahambe etshela abantu ukuthi nguye owamthathayo, okuyikho osokusenziwa nguMnu Sibanda.
UMnumzana Abel Ndlovu oyisakhamuzi sakule indawo uveze ukuthi uyakholwa ukuthi umlisa lo nguye okwaziyo ukuthi umntwana lo owacatshayo ungaphi ngoba kulesihlobo sakhe esihamba sikhuluma ukuthi yiso esamthathayo.
“Mina ngiyakholwa sibili ukuthi uDlodlo uyakwazi okulomntwana khona ngoba ngeke athi uzatholakala sengamathambo yena engasiyo inyanga. Okunye njalo okwenza ngikholwe yikuthi ulesihlobo sakhe uEvias Sibanda ohamba ekhuluma ukuthi umntwana lo nguye owamthathayo.
“Ekukhulumeni kwakhe uthi ugcinwe ku-ceiling njalo nguye omupha ukudla nsukuzonke. Lokhu kusuka kungisolise sibili nxa uDlodlo ekhuluma njalo,” kutsho uMnu Ndlovu.
UMnumzana Joel Mpofu ubikele intatheli ukuthi njengesigaba bazwa ubuhlungu ngoba amapholisa amisa abaphurofethi ababelande ukuzodinga umntwana lo bona bebabize okusemthethweni.
“Thina sizwa ubuhlungu kakhulu njengezakhamizi ngoba sacatshelwa ngumntwana sabiza abaphurofethi abasebenza lathi ngokuthula kodwa khathesi amapholisa sebamisile sesithi bengasebenzi.
“Lokhu kungenxa kamlisa owabikela amapholisa amanga ethi abaphurofethi laba balamanga njalo bangamasela esenzela ukuthi bengaqhubeki besebenza. Ngalokhu sesiswele ukuthi senze njani ngoba silelungelo lokudinga abantu bokusisiza empilweni kodwa amapholisa ayasivalela,” kuveza uMnu Mpofu.
Ekhuluma loMthunywa uPrecious Ndlovu uchaze ukuthi bona abakufunayo yikuthi abaphurofethi laba baqhubeke besebenza njalo balethemba lokuthi umntwana bazamvumbulula.
“Thina esikufunayo yikuthi amapholisa avumele abaphurofethi baqhubeke besebenza ngoba siyazi ukuthi besebezamvumbulula umntwana. Ngitsho lokhu ngoba bakhuluma ukuthi umuntu owathatha umntwana uzaziveza bengakamkhiphi nanku khathesi uEvias usehamba ebikela abantu,” kuveza uNkszn Ndlovu.
Ebuzwa ngale indaba uyise womntwana owacatshayo uMnumzana Kenias Ncube ulandise ukuthi kwahamba njani mhla umlisa lo emtshela amagama la abuhlungu.
“Ngathi ngikomakhelwane wami uDlodlo wangimemeza wathi ufuna ukukhuluma lami. Ngahamba kuye ngithi mhlawumbe kukhona afuna ukungazisa khona wafika wangibuza ukuthi umntanami lokhe ngingakamboni yini lami ngavuma.
“Ngemva kwalokho wathi kangisoze ngimthole ephila njalo akulamphurofethi kumbe inyanga ezambona yena uzabuya lequla lakhe ezokhulumisana lami. Wabuya njalo wathi umntwana lo kazalwa yimi ngakho ngingazihluphi ngaye. Ngamangala ngaswela lokuthi ngimphendule ngithini ngasuka ngayabikela umkami. Ngokubona kwami uDlodlo nguye okwazi lapha okulomntanami khona,” kutsho uMnu Ngulube.
Unina walumntwana uNkosikazi Annah Ngulube uthe indaba le wayizwa kodwa iyamethusa ngoba kayazi njalo imzwisa ubuhlungu.
“Mina ngatshelwa ngumkami ukuthi umlisa wathi umntanami sizambona esengamathambo. Lokhu kungizwisa ubuhlungu njalo kungenza ngicabange ukuthi uyakwazi okulomntanami khona. Okunye njalo okungimangalisayo yikuthi kungani ethi umntwana kasowomkami ngoba mina ngazi engowakhe asazi ukuthi okwenza atsho njalo kuyini,” kutsho uNkkz Ngulube.
Ebuzwa ngale indaba uMnu Dlodlo uchaze ukuthi indaba le kayazi njalo kazange abikelwe ngayo, wachaza ukuthi abantu abalwa laye balamacala abo amanengi abawenzayo.
“Mina kangizange ngithi umntanakhe uzatholakala esengamathambo kodwa ngathi sifuna otsikamutanda bamveze njalo kabazange bangibikela lamhla kucatshe umntwana, ngezwa ngabantu ukuthi kulomntwana owacatshayo.
“Okunye njalo abantu batshelela induna eceleni bethi ingixotshe besenzela ukuthi bathathe isikhundla sami sobulisa, angazi ukuthi bazasithatha njani njengoba sithathwa ngokosendo,” kuphetha uMnu Dlodlo.
Online Reporter