adminYiNtatheli kaMthunywa
UMQEQETSHI wodumo kumdlalo we-taekwondo kuleli uRicky Tembo ubike ukuthi sesungule uhlelo lokufundisa abantu ukuthi baphatheke kumidlalo ye-Martial Arts ukuze balolondoloze imzimba yabo kanye lokufunda ukuzivikela nxa behlaselwa. Uhlelo lolu lubizwa ngokuthi yiBlack House Fight Club njalo uTembo ubike ukuthi ukhethe ukulusungula ngoba enanzelela ukuthi ukwanda komidlalo yeMartial Arts kumadolobho amanengi. “Imidlalo le okuthiwa yiMixed Martial Arts isilodumo phose umhlaba wonke. Lalapha eZimbabwe sebebanengi abantu abayikhwabithayo. Ngaphandle kokuthi imidlalo le iyaqinisa umzimba, iMartail Arts ngokwayo iyanceda ukuthi sihlale silolwazi lokuzivikela kuzigebenga ezingabe zihlose ukuzilimaza. “Udumo lwemidlalo le luvela ekuthini abalandeli bayo bathanda ukuthi kuyavunyelwa ukulwa ngendlela zonke. Ngikubone kufanele ukuthi lathi eZimbabwe sisungule imidlalo le ngomfutho,” kubika uTembo. Uthe uhlelo lolu lusacathula ngoba usadinga usekelo oluzaphathisa ukuthi lusabalale. “Banengi abatshisekela ukuphatheka kumidlalo le. Inkinga esikhangelane layo ngeyokuthola inkundla yokulolongela kuphela.” Imidlalo le ilosekelo olwedlulisileyo emazweni abalisa iMelika, eRussia, eNgilandi, laseSouth Africa. Umdlali wakuleli uElvis ‘‘Bomber’’ Moyo ngomunye wabadlali abadonsa uTembo ukuthi asungule uhlelo lweMixed Martial Arts. UMoyo ubesilwa kulumdlalo engaphansi kwenhlanganiso yeUltimate Fighting Championship eseSouth Africa. Imidlalo ebizwa njenge ngxenye yamaMixed Martial Arts ibalisa ijudo, itaekwondo, iwushu, ikarate, ikickboxing le-jiu jitsu. Imidlalo yeMixed Martial Arts ayiladumo kangako emizini yabantu abansundu, kukanti abanye abawukhwabithi ngoba bethi yimidlalo elodlame. UTembo uthe umlandu ukubalandeli balimidlalo ukuthi basukumele baphezulu. Ungcitshi yezokulwa le ephinda abengumkhokheli womdlalo we-taekwondo eMatabeleland uthumele iphephandaba likazulu umbiko wathi njengokuphawulwa kwekhalenda yabo yomnyaka ozayo, sebezaqala ukungenangena emalokitshini befundisa intsha ngalumdlalo.
Online Reporter