admin
Johas Moyo
ABENHLANGANISO yeEnvironment Management Agency bakhuthaza abalimi ukuthi balandele ukuguquka komumo womkhathi bavikele imvelo ngoba layo isengozini.
Kubikwa izihlahla, izibungwana, inyamazana kanye lezinanakaza akuselampilakahle ngenxa kokuguquka komumo kanye lokubhidlizwa kwemvelo ngabantu.
UMnumzana Kudakwashe Manyanga onguEnviromental Management Agency Researcher Officer esabelweni seMatabeleland North ukhuthaze abalimi bonke elizweni ukuthi bavikele imvelo ikakhulu nxa kugolwa amacimbi ezihlahleni, ukudla kweganga konke jikelele, amavevane, inyoni kanye lezinanakazana zonke ezikhona.
“Sikhuthaza abalimi ukuthi bananzelele ukuthi izihlahla zivikelwe ngesikhathi kugolwa amacimbi ngoba abantu babulala izihlahla.
“Amacimbi kawekelwe akhule amanye angene phansi ukwenzela ukuthi abengamavevane ukuze kube lenhlanyelo yawo angatshabalali wonke,” kutsho uMnu Manyanga.
Uqhubekele phambili njalo ngokufundisa abalimi ukuthi inyamazana zeganga nxa zingasatholi ukudla okwaneleyo ikakhulu izithelo zeganga ziba lolaka zicine zilimaza abantu.
“Sikhuthaza abantu ukuthi bananzelele ukuthi inyamazana zeganga ziphila ngomqokolo, umkhemeswane labomviyo ngokunjalo abantu kabangaqedi lokhu kudla bekuthwala ngamasaka ngoba balambisa inyamazana zasendle okwenza inkawu labondwangu kugcwale ekhaya kusona ngoba kuyabe kungaselakudla egangeni.
“Ezinye njalo inyamazana ezingaba luhlupho zingulube zeganga kanye lenhloni ngoba kulakho ukubuya kuzokudla ukudla emasimini.
“Yikho njengeEMA sikhuthaza abantu ukuthi bavikele imvelo njalo ngazo zonke izikhathi bakwazi ukuthi inyamazana kanye labo njengabantu kudinga imvelo ukuthi ziphile,” kutsho uMnu Manyanga.
Uphethe ngokukhuthaza abantu ukuthi njengabakhangela ngemvelo kumele bangabona inyoni zizinengi endaweni yabo benze imizamo yokuzixotshela kwezinye indawo.
Online Reporter