admin
Johas Moyo
INHLANGANISO yeAgritex ikhuthaza abalimi ukuthi bavune izilimo esezivuthiwe emasimini ngoba zilakho ukumila okungenza bacine belahlekelwa yikudla okulutshwana akade bengakuthola.
UProvincial Agricultural Extension Officer wesabelweni seMatabeleland North, uMnumzana Dumisani Mbikwa Nyoni ubikele abalimi ukuthi baqaphele ukudla kungacaphakeli emasimini ngoba kukulutshwana kakhulu ukudla lonyaka.
“Sikhuthaza abalimi ukuthi badobhe izilimo zabo esezivuthiwe izulu lingakaziphambanisi. Ngenxa yezulu leli elinayo izilimo zilakho ukubola kumbe ukumila kungakho sicebisa abalimi abalime izilimo eziphangisa ukuvuthwa njengendumba ukuthi bazidobhe khathesi ngoba bengekela ukukwenza lokhu umangoye engasala ezilalela eziko,” kutsho uMnu Nyoni.
Uqhubekele phambili njalo uMnu Nyoni ecebisa abalimi ukuthi ezinye izilimo kazivuthwa sikhathi sinye kungakho kumele baziqaphele ukuze lazo bazivune.
“Izilimo azivuthwa sikhathi sinye, ziyatshiyana. Amabele lenyawuthi yizilimo ezivuthwa masinyane ezifuna ukuthi nxa zingavuthwa zikhutshwe emasimini zingakanethwa lizulu ngoba ziyaphangisa ukumila njalo inengi labalimi kabananzelele ukuthi lonyaka izilimo zivuthwa ngokutshiyana kungakho esezivuthiwe kazikhitshwe emasimini zingakaphambaniseki.
“Abanye njalo bayekela lezizilimo zidliwe zinyoni kukanti nxa kuyindawo elezibungu ziyadliwa njalo yibudli lobu kukanti zingakhutshwa abalimi balakho ukuzidlela,” kutsho uMnu Nyoni.
Uphethe ngokucebisa abalimi ukuthi baqaphele imikhuhlane ezilimweni zabo ngoba isanda nxa izulu lisina.
“Abalimi kabahlale behlola emasimini abo ukuze baphange babone nxa sezihlaselwa yizibungu kanye lembovane bazifafaze ngokuphangisa,” kutsho uMnu Nyoni.
Online Reporter