admin
Ethel Ncube
KULAMASELA ajeziswe ngokubotshelwa enqoleni njengabobabhemi ngemva kokuba ebanjwe evuna umumbu ensimini yabanikazi eNswazi esigabeni seMzingwane.
Lokhu kwenzakale ngeviki ephelileyo lapho abasolwa ababili laba okungasatholakalanga amabizo abo ababanjwe bedonsa inqola igcwele umumbu akade bewuvune emasimini abanikazi baboniswa into yamehlo sebejeziswa ngokuthwqaliswa ijogwe badonsiswa inqola.
Ekhuluma lentatheli omunye wezakhamizi uMnumzana Bekezelani Dube uveze ukuba abantu laba bebehlala betshontshela abantu emasimini bethi abasoze babanjwe.
“Bazitshele ukuthi njengoba abantu kuthwe bahlale makhaya bazabonwa ngubani kanti ababuzanga elangeni. Izakhamizi zibenzele okunye bakhulula obabhemi babo babopha wona amasela kwathiwa kabadonse inqola yomumbu igcwele isiyakumnikazi wensimu.
“Lesiyana kube yisifundo esihle kakhulu abaphindi futhi batshontshe abantu bangathi belima nzima bona bafike bazithathele mahala nje, hayi akulunganga lokhu,” kutsho uMnu Dube.
Esinye isakhamuzi sakule indawo uMnumzana Eliah Sibanda uveze ukuthi afundiswe isifundo esifaneleyo amasela.
“Amasela la afundiswe isifundo esifaneleyo sibili kodwa ingozi engiyibonileyo lapho ngeyokuba abantu besebebuthene bengasakunaki ukuthi kulomkhuhlane weCorona virus.
“Besokuyisiminyeminye abantu befuna ukuzobona amasela la khona kwathiwa aqkumelanga sisondelane ngba lokhu kungasingenisa engozini yokubamba lumkhuhlane,” kuphetha uMnu Sibanda
Online Reporter