admin
Intatheli kaMthunywa
APHELEWE yikuhlakanipha amasela embuzi abesedlisa izakhamuzi luklubhu esigabeni seSitakeni eGwanda nanko phela athe elokhu eqhuba imbuzi ukuze ayozifihla zahle zabakhalela.
Amasela la, uDingani Moyo, Saddam lo Dalico okusatholakalanga izibongo zabo kubikwa besebethwalise nzima izakhamizi ngokuhlala bezitshontshela imbuzi bahambe lazo kweleBotswana.
Kubikwa ngenxa yokuhlala zitshontshelwa izakhamizi zacina zibambana zabumba iqembu elibizwa ngokuthi yiScopion eliyilo elisize ukuthi amasela la abanjwe ebusuku eqhuba imbuzi ezingu-70.
Intatheli kaMthunywa ixoxisane loMnumzana Ephraim onguMgcinisihlalo weqembu leli eliphathisana lezakhamizi ukuba kuvikelwe izifuyo.
“Iqembu lami lezwa amasela la eqhuba imbuzi ebusuku lagijima lawahanqa okuyikho okwenza abanjwa lembuzi ayezitshontshile. Sabikela njalo lamapholisa kodwa sisiyabikela amapholisa sawatshiya labafana sathola esebahlasele abaleka.
“Kasizange sithande ukuphozisa amaseko sawalandela emzini yawo sathola koSaddam kulezimbili ebeziphila enye sibulewe, koDingani sathola ezintathu uyise wahle wakhipha iqiniso ukuba ayisizo zakhe njalo kakaze abe lomhlobo onjalo esibayeni sakhe. Kukanti isela lesithathu lokhu lisadingwa ngoba lahle labaleka,” kuchaza uMnu Ephraim.
Esinye isakhamuzi uNkosazana Molly Moyo uveze ukuthi ngemva kokuba sebephathiswa yiScopion sokulomehluko omkhulu ngoba abantu laba bahlezi bekhona ezigabeni bebona okwenzakalayo.
“Lokhe kwaba leScopion esigabeni sethu sokwatshintsha amasela asebanjwa sibili ngakho bengilesicelo esikhulu kumapholisa ukuba baxhase amaqembu lawa asezigabeni zethu kulwiswane lobusela ngoba sesiphelelwe yizifuyo zethu,” kulandisa uNkszn Moyo.
Imizamo yokukhuluma lesikhulumi samapholisa esabelweni seMatabeleland South yehlule.
Online Reporter