admin
IDOLOBHO lakoBulawayo seledlulise amaviki amabili kungatholakalanga muntu olegcikwane leCovid-19 osokwenze abantu kanye labezempilakahle kulindawo bakhokha umoya ngemva kokuba kuke kwaba lesikhathi lapho obekuthiwa uBulawayo ‘yisigodlo’ se-Covid 19 kumaviki edluleyo. Idolobho leli laqala ukuzwa ngesigulane esilomkhuhlane lo mhlaka 8 Mabasa kwathi kusiyafika umhlaka 15 abalegcikwane leli basebengu-10. Abahlanu balaba bantu batholakala belomkhuhlane lo ngasikhathi sinye mhlaka 15 Mabasa. Ngalesi sikhathi koNtuthu kwakulabantu abanengi abalegcikwane ukwedula amanye amadolobho kulandela iHarare eyayilabangu-8.
Kusiyafika oLwesithathu idolobho leli belilokhe lilabantu abalegcikwane leli abangu-10 okutsho ukuthi okwensuku ezingu-12 akulamuntu otholakale elegcikwane leli phakathi kwalabo abahloliweyo. Yiloba umuntu wakuqala elizweni ukutholakala elegcikwane le-covid 19 wavezwa mhlaka 20 Mabasa engowesilisa oleminyaka yokuzalwa engu-38 njalo ehlala eFolosi eke njalo wavakatshela kwele-United Kingdom wahlala ngekhaya ezivalele ngokunjalo akulamuntu owake waxhumana laye owatholakala elegcikwane le-Covid 19. Lo ngomunye wabahlanu asebasilayo okugoqela abanye abane abeMashonaland East. Abangu-8 abalegcikwane leli koBulawayo kukhanya babalobudlelwano lesigulane sesi 11, esingasekho emhlabeni u-Ian Hysop (79).
Okwamanje, idolobho kukhanya selenelise ukuvimba ukumemetheka kwegcikwane leli eselithethe impilo zabantu abedlula izinkulungwane ezingamakhulu amabili emhlabeni wonke jikelele. Abezempilakahle babika ukuthi ukulonda abake babalobudlelwano labalegcikwane leli kanye lokuhlala ezindlini kwabantu kuphathise ukuba lumkhuhlane ungamemetheki masinyane.
Amapholisa akoBulwayo lawo abebopha abantu abephula umthetho wokuhlala ezindlini. UDokotela Welcome Mlilo onguProvincial Medical Director utshayele abezempilakahle koBulawayo ngokulonda abake babalobudlelwano labalegcikwane leli, lokhu athe kungumsebenzi omqoka ekulwiseni igcikwane leli.
Uthe inani labantu abahlolwa batholakala belegcikwane leCovid 19 koBulawayo lokhe liku 10.
“Abalonda abake babalobudlelwano lomuntu olegcikwane leli benza umsebenzi omuhle kakhulu. Lumsebenzi uyaqhubeka njalo amaRapid Response Teams enza lumsebenzi nsuku zonke.
“Bonke abalegcikwane le-Covid-19 koBulawayo bagcinwe ezindlini zabo njalo bahleli bekhangelwa njalo besizwa. Bonke basesimeni esihle.”
UDokotela Solwayo Ngwenya ongu-Acting Chief Executive weMpilo Central Hospital uthe yiloba nje kukhanya angani igcikwane leli kalimemetheki masinyane kulelidolobho lokhu akutsho ukuthi asikho engozini.
“Lisakhumbula ukuthi sathola umuntu wakuqala olegcikwane leli uMongameli esememezele ukuthi abantu bahlale ezindlini. Lokhu kwaphathisa abeRapid response team ukuthi balonde ababeke babalobudlelwano lalabo abatholakala belegcikwane leli ngendlela efaneleyo basebebaphatha ngendlela okwakumele baphathwe ngayo.
“”Ngabe akubekwanga mthetho wokuthi sihlale ezindlini ngabe abantu abazinkulungwane bathola umkhuhlane lo,” kuphetha uDkt Ngwenya.
Online Reporter