Online Reporter
Sukulwenkosi Dube-Matutu
AMAPHOLISA abophe abetheswacala ababili ngensolo zokungenisa imbanje ezilesisindo se-200kg kuleli zivela eSouth Africa kusetshenziswa umngcele weBeitbridge.
Isikhulumi samapholisa eMatabeleland South uInspector Chiratidzo Dube uqinisekise ngokubotshwa kukaBenjamin Mutezo (26) wakoBulawayo kunye loJealous Moyo (39) weBeitbridge.
“Mhlaka 20 Ntulikazi ngehola lesibili ngemva kwemini enkulu, abacuphi beBeitbridge bamukela udletshana lokuba kule-Honda Fit ethwele imbanje zisuka eForit, eBeitbridge zisiya eYellow House eBeitbridge.
“Abacuphi balandela umkhondo we-Honda Fit elenombolo ezithi AEY 1813 bayimisa. Umetheswacala wesibili wayengumtshayeli kukanti umetheswacala wokuqala wayehlezi eceleni.
“Kwahlolwa imota kwatholakala imbanje zipakitshiwe zabotshwa ngamapulastiki amnyama lamhlophe. Ababili laba bahle babotshwa,” utsho njalo.
U-Insp Dube uthe ekuchwayisiseni ngodaba lolu, uMutezo waveza ukuthi uthenge imbanje lezi eGoli ukuze ayezithengisa koBulawayo. Uthe waqhatsha lo ayelaye ukuthi bazithwale bazise endlini yesinye isihlobo sakhe eBeitbridge.
Ungezelele wathi umetheswacala wabuye waveza ukuthi ezinye imbanje basebezihambisile endlini leyo.
Ababili laba babuye bahamba labacuphi endlini leyo lapho abafika bahlola bathola imbanje ezingaba yi-100kg. Uthe imbanje zonke ezatholakalayo zilesisindo se-200kg.
