Babhekise amabombo eHarare abagijimayo

Lovemore Dube

ABANTWANA bezikolo zeSecondary abakoBulawayo bakhangelele ukwenza ngcono kumncintiswano weNational Association of Secondary School Heads Track and Field ePrince Edward, eHarare.

Benzelwe idili lokubavalelisa ngoMvulo ekuseni bengakangeni umango.

Kuzancintisa abafundi abangaphansi kweminyaka yokuzalwa engu-16, 18 le 20.

Imidlalo le ibakhona minyaka yonke.

Kumaviki amabili edluleyo izikolo zakoBulawayo zabuthana eWhite City zancintisana ukuthi kukhethwe abazayamela isabelo.

Abazanqoba eHarare bazakuya mela ilizwe kumidlalo eSouth Africa.

UAleck Vova ukaputeni wakoBulawayo uthembise ukuthi kabasoze bayangise. Ukhuthaze abanye bakhe ukuthi baphakamise uBulawayo ngokuthola imendulo.

UVova oyingcitshi yokweqa ulerekhodi yokweqa i-2.10m.

Ukhangelelwe ukuthi abuye lemendulo yegolide. KoBulawayo kulabafundi abangu-67 abazaphatheka kumincintiswano le, eHarare ekhangelelwe ukuqalisa ngoLwesithathu iphele ngoLwesine.