Online Reporter
YiNtatheli kaMthunywa
AMAPHOLISA abika ukuba abophe amadoda amane, esiqintini seBhule, eTsholotsho ngecala lokutshaya lokubulala enye indoda okubikwa ibanjwe itshontsha komunye umuzi, ngesikhathi ezinye izakhamizi zisemfeni eduzane.
Kubotshwe uMusa Donga (45), Nkosilathi Nkomo (56), Benjamin Moyo (51) loCalbert Nkomo (45) ngecala lokubulala uSomiso Ndlovu, obeleminyaka engu-45 yokuzalwa.
Ngokubika kwamapholisa, amadoda amane la enze icala leli mhlaka 13 Nhlangula.
Kubikwa kuphenduke kwaba yisiphithiphithi emfeni, umuyi etshaywa kabuhlungu ngezibhakela, bemkhahlela.
Ngesikhathi beqeda lokhu, umuyi ubesethule.
Isikhulumi samapholisa elizweni uCommissioner Paul Nyathi uthe: “Amapholisa eTsholotsho abophe abantu abane ngecala lokubulala elenziwe eBhule Village.
Abasolwa kubikwa bahlukumeza omunye ngemva kokumthola egqekeza komunye umuzi oduzane lalapho okwakulemfa khona.”
Abasolwa kukhangelelwe ukuthi baye emthethwandaba besolwa ngecala lokubulala.
