Online Reporter
Nkosilathi Sibanda
ILIGI yeCastle Lager Premiership isifikise imidlalo engu-15, njalo kulokhe kukhokhela iqembu leMWOS.
IMWOS iqede impelaviki edluleyo iphethe imiklomelo engu-31, loba ibe ngutshiki lobhanqa nge 2-2 leqembu leTriangle.
Iqembu leli likhokhele kusukela ngeviki lakuqala lemidlalo yeligi le, okuveza ukuthi ihlose okukhulu ngesizini yalo yakuqala kuligi ephakemeyo.
Ngempelaviki efanayo, iHighlanders inqotshwe yiSimba Bhora 3-2 eBarbourfields. Lo, kube ngumdlalo lapho umqeqetshi weBosso azwe ubuhlungu, iqembu linqotshwa ngomzuzu wokucina, inengi labalandeli balo selihlabelela ukuthi lizaphuma lomklomelo eMagumeni.
IMWOS okwakhathesi ilandelwa yiSimba Bhora ephethe imiklomelo engu-29. Zombili sezihlohle amabhola angu-19, linye ngalinye.
Elinye iqembu elichinsa ukutshibilika kuPSL, eleScottland FC, likunombolo yesithathu igadle imiklomelo engu-26. Linqobe iKwekwe United 1-0 eRufaro Stadium.
Kodwa ke, umdlalo odonse amahlelo ngoweFC Platinum leZPC Kariba lapho abafana bakaNorman Mapeza abahlohle amabhola amane, kwaba yi 4-0.
Kwezinye inkundla, elinye iqembu lakoBulawayo iChicken Inn linqotshwe 1-0 yiCAPS United. IChicken Inn liqembu eselibanga emsileni weligi nanko likunombolo yesi-15, liphethe imiklomelo engu-13. Lokhu kuveza ukuthi umqeqetshi wamaGamecocks, uJoseph Antipas usephelelwe ngamaqhinga okunqoba nanko alikanqobi kumidlalo eyisikhombisa ekhaya.
IDynamos iqhubeka ngokudonsa nzima. Ibambene leBikita Minerals the 1-1. Abafana beMbare sebephume imidlalo eminengi bengutshiki lobhanqa ukwedlula lawo abawanqobileyo. Abalandeli babo badanile.
