Online Reporter
Ethel Ncube
ĶULAMADODA amabili akoBulawayo afelwa yimota duzane legaraji le-Amakhosi okubikwa athi ebona amapholisa adliwa ngumnyama atshiya imota eyayilezidumbu zenkomo ezimbili.
Indaba le yenzakale ngehola lokuqala ngoMgqibelo ngesikhathi amapholisa ebhoda ebusuku.
Kubikwa amapholisa athi ebona imota yohlobo lwe-honda fit imile asesondela kodwa ababephakathi bathi bethi jeqe bebowabona bacela ezinyaweni.
Amapholisa asondela emoteni afika ayihlola athola kulenyama yenkomo ezimbili igoqelwe ngamaphepha amnyama. Imota yathathwa ngamapholisa njalo ekuchwayisiseni kwavela ukuba umnikazi wemota uhlala eQueens Park koBulawayo yena owaveza ukuthi imota wayithengisa.
Intatheli ikhulumisane lobambele isikhulumi samapholisa koBulawayo uInspector Nomalanga Msebele obike ukuba udaba olunjalo lusezandleni zamapholisa.
“Sichwayisisa udaba lwemota eyatholakala ilenyama yenkomo phakathi abanikazi bayo bathi bebona amapholisa ayebhoda badliwa ngumnyama.
“Sicela uzulu abikele amapholisa nxa kulomuntu othengisa inyama endlini ngoba akumelanga abantu bathenge inyama engahlolwanga. Ongabe elelwazi ngamadoda la abaleka atshiya imota sicela atshayele ucingo emapholisa eMzilikazi kunombolo ezithi 0292 274439/ 277619 kumbe abikele amapholisa aseduze laye,” kubika uAsst Insp Msebele.
