Online Reporter
Zimpapers Sports Hub
EZINYE inkinga ezihlasele iHighlanders sezilungiswa, nanko ibhanga leCBZ Holdings selizinikele ekuthini lincedise leliqembu kunhlelo zayo.
Ibhanga leli seliphe amalunga oqobo eHighlanders ithuba lokuncedisa iqembu ngemali, kulandela ukubambana lebhanga leCBZ Holdings.
Phezulu kwalokhu, ibhanga leCBZ Holdings selizinikele ukuthi lilungisise indlu yaleli qembu, ebizwa ngokuthi yiHotel California.
Kubikwa ukuba wonke amalunga oqobo azasebenzisa ikhasi lebhanga leCBZ, ekuthini lapho nxa esebenzisa lelikhasi, kulesilinganiso semali esiphiwa iqembu. Ikhasi leli liyiVisa Card njalo lilohlelo lwe-funeral le-medical cover.
ICBZ Holdings yethule lokhu ngoLwesihlanu ngeviki edluleyo lapho ebike ukuthi izakuba yingxenye kusekelo lokuncedisa iHighlanders ithakazelele iminyaka elikhulu ngo2026.
Umaqhuzu weCBZ Holdings uLawrence Nyazema uthe: “Njengoba silungiselela ukufikisa iminyaka elikhulu, kumele sikwenze lokhu ngokuzimisela, kube lesisindo. I-CBZ Holdings njengomxhasi weqembu izimisele ukuba phakathi kwamalungiselelo la ukuze umcimbi weminyaka elikhulu ubeyisikhumbuzo esikhulu, esiveza lembali yenguqu yeZimbabwe.”
Uthe bazalungisisa isakhiwo seClub House lendlu le, eseLuveve.
“Ngokunanzelela isimo esihle seqembu leHighlanders, ngokuba leClub House, eyisibonelo zokuphathwa kuhle kwenhlelo zemidlalo, sizimisele ukusebenzelana leHighlanders ukuze sithuthukise lindawo.
“Sizenza okufanayo laseHighlanders Village. Ngakho sithi ukuthakazelela iminyaka eyi-100 akumelanga kube ngumcimbi omncane.”
Ukuza kweCBZ Holdings kuBosso kwengeze inani laamankampani asekela iqembu ngemali. Amanye yiSakunda Holdings, Better Brands, Utande, Sanctuary Insurance leNyaradzo Funeral Services.
