admin
Ethel Ncube
BABEQINISILE abadala nxa bethi impindamuva yingozi nanko phela kugcwaliseka ngokuqhamuka kwempi phakathi kwabomakorokoza lomninibhawa weSharks Nite Club eselokitshini leHabane, eSigodini kulandela ‘ukudutshulwa’ komunye wabo ngulo usomabhizimusi.
Lesi siga senzakale kuvuka kungoLwesine kuviki ephelileyo lapho omakorokoza abazithi ngomaNkayi abahlasele indlamanzi ebezinatha ebhawa kaBaron Dube ngenhloso yokuphindisela ukulinyazwa komunye wabo.
Kubikwa uNkosazana Tamia Ndlovu osebenza kule ibhawa uthe ebona ukuthi sekumi manzonzo waphanga wabikela uMnu Dube ukuthi azobhula umlilo kodwa wathi akufonelwe amapholisa.
Kuzwakale ukuba ngaleso sikhathi kwasokukubi ebhawa le nanko phela omakorokoza basebegcwele bephosa amatshe phakathi ngapha behlome ngamahloka ababetshaya ngawo abantu ababebaleka.
UMthunywa uzwe ukuba kusiphithiphithi sonke lesi kulabantu abahlanu abalimalayo njalo basesimeni esibi.
Intatheli ixhumane loNkszn Ndlovu obekhona kusenzakala lokhu ochaze ukuthi iqembu leli labomakorokoza lalingakhanyi ukuthi lenzani ngesikhathi behlezi ebhawa kunatha oyedwa. Uchaze ukuthi: “Omakorokoza laba bafika lapha umdala (uDube) esesekhona inengi lakhona lalinganathi lalizihlalele kwathi sekuzatshaya ihola lesibili ekuseni waqala umsindo sekutshaywa abantu samfonela wathi sifonele amapholisa, kodwa aphuza ukubuya baze bazihambela omakorokoza laba batshiya belimaze abantu abahlanu abagijinyiselwa esibhedlela seSigodini.”
Iphephandaba likazulu libuye lakhulumisana lomninibhawa uMnumzana Dube yena oveze ukukhathazeka lokungahlaliseki ngesenzo sabo makorokoza laba.
“Kangikwazi ukuthi omakorokoza laba bangibanisani njalo ukwenza kwabo kungani liqembu elithunyiweyo ukuthi lizokulwa ebhawa yami. Mina ngafonelwa ngala ukuyafika ebhawa ngoba ngingazi ukuthi amaNkayi lawa angabe ehlome okunganani,” kutsho uMnu Dube.
Umninibhawa lo uveze ukuthi yena uzwa ubuhlungu ukuthi abathengi bafela into abangayaziyo njalo lokhu sokuwisa ibhizimusi yakhe.
UMthunywa uzame ukuxhumana lesikhulumi samapholisa uInspector Philisani Ndebele yena ongatholakala ecingweni kodwa indaba le isezandleni zamapholisa eSigodini.
Online Reporter