admin
YiNtatheli kaMthunywa
KULENDODA ehlala eSiamagoba eBinga ezithezele olulenkume ngemva kokutshaya unina ngodondolo waze wafa.
Umetheswacala uSolomon Dube oleminyaka yokuzalwa engu-45 kubikwa wenze ihlazo leli mhlaka 6 kuyonale inyanga ngesikhathi elomuyi ongunina uEsca Dube oleminyaka yokuzalwa engu-80.
Isikhulumi samapholisa esabelweni seMatabelelend North, uInspector Siphiwe Makonese uveze ukuba umuyi waya emzini kametheswacala lapho afika wabuza khona umntakametheswacala ngokucatsha kwenkomo ayezelusile.
Kubikwa umuyi wafika emzini kametheswacala wabuza umzukulu wakhe ngenkomo ezazicatshile. Umetheswacala yena wayelele ekamelweni lakhe wezwa umuyi ebuza umntanakhe ngodaba lolu. Kukhanya umetheswacala kakuthandanga lokhu kungakho waqala ukutshingela unina. Umuyi waqhubekela phambili ebuza umetheswacala okwabangela ukuba acine esemsusela amanqe.
Umetheswacala watshaya umuyi ngodondolo lwakhe umzimba wonke okwacina kubangela ukuba awele phansi. Ngesikhathi esewele phansi umetheswacala waqhubekela phambili emtshaya ekhanda okwabangela ukuba alimale
Ebona ukuthi usedale icala wacela ezinyaweni watshiya unina ethe daca phansi.
Elinye ilunga lemuli yakhe lambona laselimgijimisela ekilinika.
Insp Makonese uthe umetheswacala usezandleni zabo njalo basacwayisisa ngecala leli.
“Ngithanda ukukhuthaza uzulu ukuba nxa belohlupho kumele bakhulumisane kuhle njengezimuli bekele ukulwa nxa kusehlula bangabuya emawofisini ethu abona ngobudlelwano emakhaya ukuze kukhunyiswane umlotha, ” kuphetha uInsp Makonese.
Online Reporter