Online Reporter
NgeSonto ezayo, kuyabe kuyisonto yokuqala kumnyaka ka2026, ngithemba umuntu wonke ukhangelele ukuphila impilo engcono, lathi esikhonzayo sikhangelele ukukhuphula izinga lethu lokukholwa njengoba siyabe sesiqalise umnyaka omutsha.
Ngelinye ilanga ngathi ngivela enkonzweni ngabona abanye odade engikhonza labo besenza imihlolo begqoke izembatho zebandla. Babekhelela umagwebu ngapha bephethe bephaquza igwayi belamadoda abanikazi bengagqize qhakala. Babehlezi endaweni yokuzithokozisa, kwakukhala lengoma begida imigido yakulezinsuku okugidwa ngendlela ehloniphisayo.
Kwakuze kukhanye insitha. Ngama ngakhangelisisa ngisithi mhlawumbe angibonisisi kuhle njalo ngicabanga ukuthi njengoba ngingumholi wabo kuqembu lokuhlabela ebandleni bazakwethuka kodwa bathe bengithi gaga bahle bagida ngamandla betshengisa ukuthi into abayenzayo bayayazi abayifaniseli.
Omunye wakhona waze wangiphakamisele isandla ebobothekiswa mhlawumbe yimbodlela yotshwala ayebunatha.
Khathesi ungakhangela abantu abanengi kumabandla atshiyeneyo izenzo zabo ngeke uthi ngezamakholwa, lemiyalo elitshumi ungathi abasayilandeli. Ungababona ekuseni ngeSonto begqoko izigqoko zamabandla abo bayabe becwebezela begodle amabhayibhili lezihlabelelo, kodwa nxa bephuma esontweni izenzo zabo ziyabaphika.
Nxa ungathi uyababonisa ukuthi umuntu okhonzayo kumele aziphathe ngendlela enjani, bajike bakuphendukele bathi okumele ahlulele nguMdali, uMvelingqangi hatshi umuntu kodwa, labo odade engikhuluma ngabo ungabathola behlabela kuqula lebandla lethu uzwa angathi lomduli wesonto uyanyikinyeka laye uSatani uvela afohle ngefasitela ngoba amazwi abo ayabe etshoka ehlaba okomtshoko labathanda ukuwozela bavele bavuke khwatshu, ngoba lawe uyabe usuzibonela ukuthi ingilosi zingafika noma nini.
Abanye ubathola bekumabhawa lawa ebusuku lawa abizwa ngolimi lwabondlebe zikhanyilanga ngokuthi ngama- night club. Bagide kuze kuse kuthengiswa lomzimba ngesonto bazonikela ngaleyo mali. Ngiyake ngibone labanye abazithi ngabaphrofethi abagqoke ezimhlophe izembatho, zingenwa ebusuku isonto zakhona ezinye emini uthola umuntu wakhona ebatshitshanisa abafazi bakhohlwe ukuthi ibhayibhili incwadi engcwele ithi ungafebi. Abanye ngabacina sebelomkhuhlane wengculaza bawumemethekise kubazalwane ngobunengi baphinde bangathandi lokuyahlolwa igazi lalapho sebegula.
Umuntu wakhona uqhubeka egabhisa abantu beNkosi ebapha lamambodlela alamanzi omthandazo, uzwe sekuthiwa baguliswa yisihlobo thize kudaleke inkalakatha yenzondano.
Inengi labantu ofica bembaxa mbili mhlawumbe sekubangelwa yikuthi sekuhanjelwa emasontweni ukuyacitha isizungu. Ngikhumbula umfundisi webandla lami ngisakhula sisangena iSunday school wayesifundisa ukuthi umuntu okhonzayo kumele aziphathe ngendlela enjani sakhula singabobhudi labodade abamhloniphayo uNkulunkulu ngazo zonke izikhathi.
Kwakungavamanga ukusithola sisenza okuphambana lemfundiso kamfundisi lezinsuku yisisanasana umtshado wezinja ufica amakholwa begida umagida sibhekane.
Ayixabene!
