admin
Cornelius Luphahla
ZIKHUZA imihlola izakhamizi zesigabeni seMafa eLupane ngemva kokuba ijaha elileminyaka engu-18 linyenyele uninomncane ebusuku lifuna ukumdlwengula kanti kalibuzanga elangeni ngoba uyisemncane ubekhona.
Isiga lesi senzakale ngoMgqibelo ntambama lapho uMthokozisi Bhebhe (18) angenele khona uNkosazana Mirriam Ncube (32) elele lomkakhe.
Kubikwa umetheswacala ubecabanga ukuthi uyisemncane usemsebenzini.
UMthunywa ukhulumisane loMnumzana Washington Ndlovu ongumakhelwane oveze ukuba unina kametheswacala uyisihlobo sikaNkszn Ncube.
“Ujaha lo ungenele uninomncane ntambama engazi ukuthi uyisemncane ukhona wasebaleka ngemva kokuzwa ilizwi likayise omncane.
“Umfana lo kahloniphi sibili kambe angaze afune ukudlwengula unina omncane,” kutsho uMnu Ndlovu.
Ebuzwa ngale indaba uNkszn Moyo uthe kalankani ngesiga esenziwe ngumetheswacala ngoba siphose samxabanisa lomkakhe.
“Angilamathe ngokwenziwe nguMthokozisi ngokungingenela ngilele. Mina ngizwe umkami ethethisa ebuza ukuthi ngubani ngisebuthongweni ngase ngiphaphama. Kuthe kunjalo wakhanyisa ethi kulomuntu obesengene engutsheni ngamangala sengibona isikipa kanye lethotshi yakhe.
“Lokhu kwenze sahle sabona ukuthi nguye sasesivala unyawo lwakhe ngebhavu salala. Kube yinhlanhla ngoba utshiye impahla zakhe kungayisikho lokho umkami ubezacabanga ukuthi mhlawumbe ngumuntu engimaziyo,” kulandisa uNkszn Moyo.
“Okungicaphula kakhulu yikuthi sokungokwesibili ekwenza lokhu ngoba ekuqaleni wayefuna ukungenela abantwabami ngesikhathi ngingekho basizwa yikuthi babekhiye umnyango.
“Indaba le sayikhuluma njengabantu banye yaphela singazi ukuthi uzaphinda. Khathesi njengoba sephindile sesizama amanye amacebo ukuze angakuphindi,” kutsho uNkszn Moyo.
UMnu Nkomo ebuzwa ngale indaba uvumile ukuthi yenzakele wathi ngeke abalise okunengi ngakho ngoba zindaba zomdeni.
“Kuliqiniso sibili ukuthi singenelwe ngumntakamnewethu ngilomkami endlini wabaleka watshiya isikipa lethotshi.
Okwakhathesi sisamdinga okunye ngeke ngikukhulume ngoba sisazokukhuluma njengomdeni,” kutsho uMnu Nkomo.
Imizamo yokukhulumisana lometheswacala yehlule ngoba ucingo lwakhe lwalile ukungena.
Online Reporter