admin
Wayne Ncube
KULENDODA yeGamulani Village eNkayi etshiye izakhamizi zakule indawo zitshwaqe imizimba ngokwenza isenzo esifana xathu lebizo lendawo evela kiyo nanko phela ingenele enye imuli emzini wayo yayigamula eyethesa icala lokuthakatha uyise owafela emgodini wamanzi.
UMlamuleli Tshuma oleminyaka yokuzalwa engu-28 kubikwa uphume ijumo wayangena emzini kamfowabo uAleck Tshuma ephethe ihloka lapho aqale khona ukugamula abantu okubangele ukuthi balimale kabuhlungu konke lokhu kubangelwa yikuthi ucabangela ukuthi ukufa kukayise kwabangelwa yibo.
Indoda ezala umsolwa kubikwa yehlelwa yingozi kuwonalo umnyaka ngesikhathi kulungiswa umgodi wamanzi nanko phela yayiphakathi komgodi igebha inhlabathi ibisiyithumela kwabaphezulu ngebhakede.
Kubikwa ngokuswelakala kwenhlanhla intambo eyayisetshenziswa ukuthwala ibhakede yaqhunsuka okwabangela ukuthi iwele uyise kamsolwa ekhanda okwabangela ukuthi ahle afe.
Loba kwakumgceke ukuthi le kwakuyingozi umsolwa kubikwa akuzange kumphathe ukufa kukayise ngoba wahle waqala ukusola abomdeni ngokufa kukayise. Kubikwa phakathi kwalabo ayebasola ngokusebenzisa umuthi ukuze uyise edlule emhlabeni nguninomdala wakhe, uSikhathazile Tshuma, umka mfowabo uSinanzeni Moyo kanye lo Lewis Ncube lo Eta Moyo.
Intatheli yephephandaba likazulu ikhulumisane lalabo abaganyulwayo abasesibhedlela seNkayi abalimala kabuhlungu mhla wokuganyulwa.
UNkosazana Sinanzeni Moyo onguNkosikazi kamfowabo kamsolwa uthe ngesikhathi uTshuma eqala ukuhlasela wayebukeka njengomuntu ophilileyo njalo oseyicabangisisile indaba yakhe.
“Wathutsha ehlabela njengensukwini, izinja zaqala ukumkhonkotha wahle waqala ukuzitshaya kwazokuthi lapho ngikhuluma laye wathi: ‘ngikhulumisa okokucina ngoba lamuhla ngilande ukuzokuqeda labo bonke ababulala ubaba ngifuna ukulibulala.”
“Ngokuphazima kweso ngezwa ngehloka emlenzeni, khonapho ngangithwele umntwana omncane yikho lapho engalwisana laye ukuze ngiphunyuke kodwa eqeda lapho wasuka ngesiqubu elanda ugogo uMaTshuma,” kulandisa uNkszn Moyo.
Ekhuluma lentatheli uNkszn Sikhathazile Tshuma onguninomdala kamsolwa ugcizelele ngalokhu okwenzakalayo umsolwa ambiza ekhwaza ekhuluma inkalakatha zenhlamba ethi ugogo ngumthakathi ngemva kwalokhu wahlasela ugogo ngokumgamula izandla zonke zombili.
“Ujaha lo uthi mamomdala kimi, kungizwisa ubuhlungu ukuthi ucabangela ukuthi sabulala uyise ngobuthakathi. Kimi wafika wangithethisa ngezinhlamba ezesabekayo, waqala ukungilanda ephethe ihloka ngezandla zombili ekuvikeni wangigamula izandla zombili, yikho lapho asuka khona eqonda emzini kaLewis Ncube wafika njalo wabagamula. Kungasibantwana ababanga umsindo ngabona wayeyaqeda umuzi wonke ngokugamula,” kuchaza uNkszn Tshuma.
Intatheli kaMthunywa iphinde yakhulumisana lesinye isisebenzi sejele yeNkayi esale ukuqanjwa ngebizo sisesabela umsebenzi waso sathi umsolwa uvalelwe njalo lapho axoxa khona uyatsho ukuthi yena wayejonge ukubabulala ngakho uyazisola ukuthi lokhe besaphila. Uthe umsolwa uthi wayengenwe ngumoya kayise owabhubhayo kungakho-ke ukholwa ukuthi yiwo owamthuma ukuthi ayephindisela nanko phela ukholwa ukuthi uyise wabulawa ngobuthakathi.
UMthunywa uphinde waxoxa njalo lesinye isisebenzi sesibhedlela seNkayi laso esale ukuqanjwa ngegama sathi kusukela saqala ukusebenza kasikaze sibone amanxeba okuganyulwa afana lala abantu abafika beganyulwe ngumsolwa. Uphinde waveza ukuthi abantu laba basile ngokulambisa engozini enkulu ngoba ngendlela ababelimele ngayo bebengahle basweleke bonke nje kodwa ngenxa yobuciko babodokotela esibhedlela basila.
Online Reporter