admin
Wayne Ncube
NGENHLOSO yokuphakamisa kanye lokunika abesifazana amandla uMphathintambo wogatsha olubona ngezabesifazana, Umphakathi, Amabhizimusi amancane kanye laphakathi laphakathi usenikeze enye inhlanganiso yabomama beMbembesi inkukhu zokufuya.
Inhlanganiso yeWolanani inikwe amatsiyane angu-1 000 kuviki ephelileyo ngoLwesine ukuze iqale uhlelo lokufuya inkukhu ukuze yenelise ukuziphilisa.
Intatheli yephephandaba likazulu yenelise ukukhulumisana loNkosazana Nolwandle Bhebhe onguye okhokhela omama beWolanani oveze ukuthi iphurojekithi le yokufuya inkukhu bebeyilindele ngamehlo abomvu, njalo balethemba lokuthi izathuthukisa isigaba sabo.
“Sithanda ukubonga uHulumende ngokusipha inkukhu zokuthi siqale uhlelo lokuzithuthukisa njengabesifazana. Lokhu kuzakwenza sekele ukulinda omkethu ukuthi basigcine kunye labantwabethu kodwa kuzenza lathi senelise ukuncedisana labo empilweni,” kuchaza uNkszn Bhebhe.
Obemele uMphathintambo wogatsha olubona ngezabesifazana, uDokotela Sithembiso Nyoni, uNkosazana Elizabeth Masuku uthe uyajabula ngoba uHulumende etshengisa umfutho wokuthuthukisa abesifazane.
“Ngiyaziqhenya ngoHulumende wethu ongenze ngafika esigabeni lesi ukuzothuthukisa abanye abesifazane. Ngimele umama uSithembiso Nyoni ngithanda ukunanzelela ukuthi uhlelo lolu lokufuya inkukhu lwabomama beWolanani luzatshintsha impilo zabantu kusukela lamhlanje,” kulandisa uNkszn Masuku.
UNkszn Bhebhe uthe inhlanganiso yeWolanani ibivele isihlome yaphelela isilinde inkukhu ukuthi iqale iphurojekithi le nanko phela ibisiyenze izilugu zenkukhu, isilemithi efunakalayo ekufuyeni inkukhu kanye lokudla kwazo.
“Saqala ukulungiselela inkukhu lezi ngesikhathi sithenjiswa inkukhu nguMphathintambo uNyoni, ngakho inkukhu lezi ezokuqala zivele sesizitholele abantu abazazithenga njalo sikhangelele ukuthi sisiya phambili siqhube kuhle iphurojekithi yethu,” kuphetha uNkszn Bhebhe.
Online Reporter