Online Reporter
Ethel Ncube
BAKHATHAZEKILE abazali abalabantwana abafunda esikolo seSiyaphambili Secondary School koNdolwane, ePlumtree kulandela ukuhlaselwa kwabantwana abayisificamunwe munye yizinto ezingaziwayo besesikolo kuviki ephelileyo.
Kuvidiyo ebhoda kunkundla zokuxhumana kubonakala abantwana besesibhedlela bekhanya bethukile njalo behlaba umkhosi ngemva kwesehlakalo lesi.
Kubikwa abantwana laba bahanjiswa ekilinika yakoNdolwane kukanti abanye badluliselwa esibhedlela sePlumtree.
Abantwana laba kubikwa babekhala ngamakhanda okwakusenza abanye babo banikwe imithi yekhanda.
Umzali okhulume lentatheli uthe abantu bacabangela ukuthi abafundi bangabe bahlaselwa ngundofa.
“Abantwana baqala besiwa esikolo abanye bathi babebanjwa yizinto bengaziboni bacine bewela phansi bengazi ukuthi bawiswa yini? Abanye njalo babesiwa babhubhudle amagwebu okwacina kudala ukuthi sisukume njengebazali.
“Ababalisi bacina besibiza esikolo ukuthi sizobabonisa okwakusenzakala ngoba kwakungazwisiseki. Ekufikeni kwethu abanye bathi lokhu kungabe kuyimisebenzi yabondofa kungakho kumele kudingwe abangazosiza ukuhlahlula bahlanze isikolo ngoba abantwana sebesesaba ukuya esikolo,” kutsho umzali lo, ongathandanga ukuqanjwa ngebizo.
Uthe abakhulekayo loba sebetholakele kodwa ondofa laba kukhanya lokhu bengakakhitshwa esikolo.
“Ngokutsho kwabakhulekayo, kukhanya kulabondofa esikolo. Okukhathazayo khathesi yikuthi ondofa laba ngabakabani. Izakhamizi sezikhombana ngeminwe zisethesana umlandu wokugcina ondofa esikolo,” kutsho umzali lo.
Omunye njalo umzali uthe ukuthi undofa ngokabani akuqakathekanga bona abakufunayo nje yikuthi bakhitshwe abantwana baqhubeke ngezifundo zabo.
“Abantwabethu sebephambanisekile ezifundweni zabo ikakhulu labo abazabhala imihloliso yabo lonyaka. Khathesi ukuthi ondofa ngabakabani akutsho lutho esikufunayo nje yikuthi bakhitshwe kuhlanzwe isikolo abantwabethu benelise ukubuyela emakilasini bayefunda.
“Abakhulekisayo bathi sidinga imvu ezasetshenziswa ukuhlanza isikolo. Uhlupho esesibhekane lalo yikuthi abanye bayala ukuthi kuhlanganiswe izimali kuthengwe leyomvu ngoba besithi umnikazi wabondofa labo usesaziwa kungakho nguye okumele athenge leyomvu kodwa okumele sikunanzelele yikuthi sizaze sifelwe ngabantwana silokhu silinde lowo mnikazi,” kuchasisa umzali lo.
Abasiki bebunda bathi abakhulekisayo basola omunye wababalisi ngokuba lesandla kusehlakalo lesi.
Intatheli ixhumane lombalisi lo esigodle igama lakhe othe lokhu okukhulunywa ngabantu akusiqiniso.
“Ngamanga ukuthi ngilabondofa mina. Ngizababophisa labo abangcolisa ibizo lami,” kutsho umbalisi lo.
