Nkosilathi Sibanda
INDODA eleminyaka engu-27 yokuzalwa evela esigabeni seNkayi, uVusani Sibanda, ivele emthethwandaba ibhekane lamacala amabili okubulala kanye lamathathu okuzama ukubulala kulandela ukuhlasela abantu akwenza endaweni le phakathi kwenyanga kaMpandula loMfumfu kulomnyaka.
Amacala la ahambelana lezehlakalo ezitshiyeneyo lapho okuthiwa kwabulawa amadoda amabili, kwathi abanye abathathu balimala ngemva kokugwazwa.
Iphephandaba likazulu, kumaviki amabili adluleyo libike ngokudingwa kwalindoda uVusani Sibanda ngamapholisa.
Uvele phambi kukaMantshi womthethwandaba weNkayi uNaison Dhambuza ngoMvulo esetheswa amacala la, kulandela ukubotshwa kwakhe ngempelaviki.
Umtshutshisi wodaba uMnumzana Raymond Matunhira uchazele inkundla ngamacala etheswa uSibanda.
Ngokwamaphepha asemthethwandaba ngemva kokuqala kokuthoniswa kwecala ngoMvulo kuliviki, icala lokuqala aletheswayo ngelokubulala elenzakala mhlaka 25 Mpandula 2026, lapho umufi owayefike emzini womfowabo eMakholiso Village, eNkayi, kuthiwa wanyamalala ngemva kokuphuma esiyadinga i-airtime eNkayi Business Centre.
Umufi wayefike emzini womfowabo u-Obedience Moyo ngehola lesitshiya galolunye ebusuku, ebona ukuthi uzalala khonapho ukuze athathe ibhasi eya koBulawayo ngakusisa ekuseni.
Kuthiwa watshiya isikhwama sakhe emkulwini wasephuma esiya ezitolo zeNkayi esiyathenga i-airtime kodwa kazange aphenduke.
Isidumbu sakhe satholakala eduzane kweNkayi Junction ngosuku olulandelayo silamanxeba amanengi okugwazwa.
Amaphepha asemthethwandaba aveza ukuthi amapholisa athola amabhulugwe e-jean eluhlaza kanye lomakhalekhukhwini kamufi kuSiphamandla Khumalo, owayesebanjiwe njalo ebhekane lamanye amacala ahambelana lesehlakalo lesi.
Elinye icala lokubulala kuthiwa lenzakala mhlaka 12 Mfumfu 2026, lapho uNkosilathi Moyo, oleminyaka engu-58 abulawa egwazwa duzane lesibhedlela seNkayi.
UMoyo wayehamba loRejoice Mangena besiyakukha amanzi emthonjeni oseduze lesititshi samabhasi eNkayi ngesikhathi bebona uSibanda loKhumalo belandela ngemva kwabo.
Kuthiwa bama ukuze babone ukuthi amadoda la ayedingani, kwathi omunye wabasolwa wabakhanyisa ngethotshi wasebabuza ukuthi benzani bemi eceleni komgwaqo.
“Ngemva kwalokho, umsolwa kuthiwa wakhupha ingqamu wagwaza uMoyo esifubeni. Lanxa uMoyo lomngane wakhe bazama ukubaleka, umuyi wacina ewele phansi ngemva kokugijima ibanga elifitshane wafa ngenxa yokulimala,” kuchaza umbiko wamapholisa.
USibanda uphinde abhekane lamacala amathathu awokuzama ukubulala.
Kwelinye icala, mhlaka 26 Mpandula 2026, uNdabezinhle Ndlovu oleminyaka engu-46 yokuzalwa kuthiwa wagwazwa ngemva kokuhlangana lomsolwa eNkayi Bus Terminus ngehola lesine ekuseni.
UNdlovu wayephelekezele umkakhe uBongisani Sibanda owayesiyagada ibhasi eya edolobheni leKwekwe.
Emthethwandaba kuzwakale ukuthi umsolwa wafika kuNdlovu wamtshela ukuthi abakhokhele baye emzini womuntu okuthiwa nguMatarirano.
UNdlovu waqala wala kodwa ngemva kokusongelwa wavuma ukuhamba labo. Sebehambe phose amamitha alikhulu, umsolwa kuthiwa watshintsha indlela wabakhokhela endaweni elehlathi.
“UNdlovu esebone ingozi wazama ukubaleka kodwa wabanjwa wagwazwa kanengi emzimbeni. Wasizwa nguTapiwa Rwizi owamusa esibhedlela seNkayi District Hospital ukuyakwelatshwa.
“Kwesinye isehlakalo mhlaka 12 Mfumfu, uTanaka Hove oleminyaka engu-19 yokuzalwa kuthiwa wagwazwa emi phandle komuzi wakhe ngehola lesitshiya galombili ebusuku.
“Umsolwa kuthiwa wafika elomunye wakhe owayephethe ithotshi, kwathi yena ephethe ingqamu, wagwaza uHove ehlombe lesandleni sokhohlo, kanye lesiswini. Elinye icala lenzakala phakathi kobusuku bomhlaka 13 Mfumfu, lapho uMusawenkosi Ncube oleminyaka engu-39 kuthiwa wahlangana labasolwa esuka eNkayi Business Centre esiya ngekhaya,” kuchaza umbiko ovele emthethwandaba kaMantshi weNkayi.
Kuthiwa uSibanda lomngane wakhe bamkhanyisa ngethotshi, uNcube ebona ukuthi kungaba lengozi wazama ukubaleka kodwa bamhlala izithende baze bambamba bamgwaza kanengi emzimbeni.
Bamtshiya elele phansi engelamandla, wacina etholwa ngumuntu owayedlula owazisa amapholisa.
Wathathwa wasiwa esibhedlela seNkayi District Hospital ukuyakwelatshwa.
Umsolwa ukhangelelwe ukuphenduka njalo emthethwandaba mhlaka 23 Lwezi evela ejele.
