Online Reporter
Fungai Muderere
INHLANGANISO yeZimbabwe Pool Association (Zipa) isizibekele umlandu omkhulu wokusungula amaligi e-pool adlalelwa zingcitshi eziqintini zonke zelizwe ngo2026.
Isikhulumi seZipa uDonald Wadawu, uthe ukukhula komdlalo wabo kubangelwe yikuzimisela kunye lokuzithoba kwabadlali abangaphansi kwenhlanganiso yabo. “Umdlalo we-pool ususabalele indawo zonke kuleli.
Uqalise ungumdlalo wokuchitha isikhathi kodwa usukhule wabangumdlalo wengcitshi, osuguqule impilo zemuli ezinengi.
“Ngakho ke, ngokunanzelela lokhu, sesifuna ukuthi umdlalo ubekhona kuzo zonke izigaba kuleli ngo2026,” kutsho uWadawu, ophinda abengumsekeli kamongameli weBulawayo Provincial Association.
UWadawu uthe i-pool isincedise ukuthi abasakhulayo babalekele ukusebenzisa izidakamizwa lokugcina imuli. “Umdlalo we-pool uphakamisa umphakathi njalo usulethe utshintsho olukhulu ezimulini.”
Uthe inhlanganiso yeZipa ilenhloso yokusungula i-pool ezikolo lakumabandla ezokholo. Kusenjalo, iqembu leQueens Pool Academy lelePremier Pool Club sezifike ku-final yenkezo yeBulawayo Province Pool Association (BPPA).
IQueens Pool Academy, yiyo eyaba yintshantshu yalinkezo nyakenye. Ingene kusigaba se-final ngokunqoba iRenegades 10-7.
IPremier Pool Club idle iDropmark 10-6.
