admin
ABALIMI besigabeni seSengezane, eGwanda bakhala ngokuthi basengozini yokuswela amanzi, nanko umfula omkhulu uThuli usecitsha.
Loba izulu lana okwedlulisileyo ngomnyaka odluleyo, indawo le ihlala ihlaselwe ludubo lwamanzi ngenxa yokuthi iyatshisa njalo ilesomiso.
Ekhuluma lentatheli yephephandaba likazulu ngoLwesihlanu omunye wabafuyi uMnumzana Luke Nkala uthe bahlalele evalweni.
“Sikhala ngezifuyo zethu lonyaka asazi ukuthi sizathini ngamanzi ngoba umfula ezinatha kiwo usucitsha. Akusela ziziba ezinkulu ezima amanzi sekugcwele itshebetshebe elinengi. “Amanye amadamu abhidlizwa lizulu elikhulu elana ngomnyaka ka2017 manje sesithembele kuThuli laye usesitsha amanzi masinya nje,” kutsho uMnu Nkala.
Omunye wabafuyi uMafiyo Nkomo uthe abakhala ngakho yikuvuselelwa kwamadamu la awadilizwa lizulu ngoba wona alapho okuledlelo lezifuyo khona loba nje kukhalwa ngomfula osucitsha kodwa lawo ukhatshana kwamadlelo enkomo.
“Umfula wethu uThuli sikhala ngaye ukuthi sesitsha kodwa ukhatshana lamadlelo ezifuyo esikucelayo lusizo olungasincedisa ukuvuselela amadamu ethu asemadlelweni ezifuyo,” kutsho uMnu uNkomo.
Online Reporter