adminNguNdumiso Sibanda
INHLANGANISO ye-Umhlahlo wesizwe sikaMthwakazi isidibane loSodolobho wakoBulawayo uMnumzana Martin Moyo ngenhloso yokumkhuthaza ukuthi abuyisele uBulawayo ekubeni yisigodlo samakhosi lamakhosikazi njengalokhu esibizwa ngakho. Umhlangano lo uqhutshwe ngeviki edluleyo ehofisini kaSodolobho.
Ekhuluma lephephandaba likazulu ngemva komhlangano lo, uMnumzana Allan Mlalazi onguNational Organising Secretary wenhlanganiso le uthe baphumelele ukwethula isicelo sabo kuSodolobho.
“USodolobho usamukele kuhle kakhulu isikhalazo sethu sokubuyisela isigodlo sakithi esikhosini ngoba laye kuzamenza aziwe njengoSodolobho wakuqala koNtuthu ukwenza lokhu,” kulandisa uMnu Mlalazi.
Ubike ukuthi isifiso sabo yikuthi amakhosi kaMthakwazi anikezwe inhlonipho ebafaneleyo.
“Akusiphathi ukuthi kuhlonitshwe amakhosi anjengabo Princess Margaret labo King George kodwa abanikazi bezwe bengahlonitshwa.
“Amabizo aboMzilikazi, oLobhengula labo Losikeyi amane ajikelwa nje. Sifuna kukhanye ukuthi ngamabizo amakhosi,” kutsho uMnu Mlalazi.
UMnu Mlalazi ubike ukuthi imigwaqo efana loLobengula Street kumele itshintshwe ibe nguKing Lobhengula Street njengendlela yokuhlonipha inkosi le eyiyo eyahlahla lesisigodlo.
“Sifisa njalo ukuthi igceke leliyana elikuMasotsha Avenue libiyelwe ngoba yindawo ehlonipheka kakhulu. Kulapho okwakusukela khona amabutho enkosi uLobhengula esiya empini.
“Nxa kusenza leLunar Park leyana isuswe laphayana, idingelwe enye indawo,” kuqhubeka uMnu Mlalazi.
Uphethe ngokuthi aluba isicelo sabo singemukelwa, sizasiza ekulobeni kakutsha njalo ngokuqondileyo imbali kaMthwakazi.
“UBulawayo nguye inkaba kaMthwakazi ngakho singenelisa ukuqondisa imbali yethu sizabe sesisenelise ukwakha ubuntu bethu,” kuphetha uMnu Mlalazi.
Kusenjalo, impumela yesicelo lesi ikhangelelwe ukuphuma ngemva kokuba uSodolobho eseqhube umhlangano lamanye amakhansila ngenyanga kaMabasa.
Online Reporter