Online Reporter
Nkosilathi Sibanda
UMQEQETSHI wenguqu olodumo lenhlonipho kuleli lakwamanye amazwe, uMandla “Lulu” Mpofu, uzizwa ekhululekile ukuthi aqhubeke esebenza eBotswana, nanko usethole umsebenzi kuTafic United eBotswana.
UMpofu, useyintandokazi yamaqembu kulelo ngoba nxa esithi uyatshiya kwelinye, akuthathi isikhathi nje, kuyabe sekulelinye elimfunayo.
Uzabe esekhuza iTafic United ngesizini elandelayo.
“Ngikhululekile ngalumsebenzi. Okumqoka yikusebenzela ukunqoba,” nguMpofu lo, ebikela intatheli yephephandaba likazulu ngempelaviki.
Kubikwa wenze isivumelwano sokuqeqetsha iTafic United okwamasizini amabili. Ubesuka kuqembu leNico United.
Iqembu leTafic United kumbiko walo ngokuqhatsha uMpofu lithe: “Silethulela umqeqetshi wethu omutsha uMandla Mpofu, esivumelane ukuba laye okweminyaka emibili.
“Umqeqetshi lo, owake waba kuMasitaoka FC, Sua Flamingoes lakuNico United, uza lobungcitshi lolwazi.”
UMpofu wake wasebenza kuHighlanders lakuChicken Inn lakuqembu lelizwe amaWarriors.
Kunyanga ezimbalwa ezedluleyo, umqeqetshi lo ubebonakala ebukele imidlalo kuDivision One lakuPremier League kuleli. Ukuqhatshwa kwakhe kuTafic United kuvale amahungahunga akade ebalisa ukuthi ubedinga umsebenzi kuleli.
