Online Reporter
Sukulwenkosi Dube-Matutu
KUSIHLUKU esenzakale eGwanda, eMatabeleland South, kulendoda etshaye enye yaze yayibulala ngenxa yokuthi ubekhuluma lomzukulu wakhe emavinkilini.
UBrian Ngulube, oleminyaka engu-48 yokuzalwa utshaye uSimon Ncube, ongumakhelwane wakhe ngesitina ekhanda, ngesikhathi emthole ekhuluma lomzukulu wakhe.
UNgulube umiswe phambili kukaMantshi uMnumzana Ngonidzashe Shumba esetheswa icala lokubulala.
Uzaphenduka emthethwandaba mhlaka 29 Ntulikazi. Umtshutshisi wodaba uMnumzana Progress Murandu utshele inkundla ukuba uNgulube watshaya uNcube mhlaka 2 Ntulikazi.
“Mhlaka 2 Ntulikazi umuyi wafika eMpondo Business Centre wasekhulumisana loNkosazana Prudence Sibanda, ongumzukulu wakhe.
“UNgulube wafika kubo waqala ukubuza ukuthi kungani uNcube ekhuluma lomzukulu lo, kwaba lokungemazwisisani kakuhle. UNgulube wadobha isitina watshaya uNcube. Kwalamula abantu ababeseduzane,” kutsho umtshutshisi.
Uthe uNcube wahanjiswa esibhedlela seMpilo koBulawayo kodwa wasedlula emhlabeni ngelanga elilandelayo.
