admin
KHUMBULA lokhu. Owesifazana ohlala lamadoda amabili endlini nye — bobabili besithi “ngumkami”. Abathathu laba; inina leli lesithembo salo samadoda, badla balale embhedeni munye, amadoda la ephana amathuba okuwatshela umkabo impahla kanye lezitshubo zabantwana. Ovele avule umlomo ale nje uvele abhulwe njengamabele.
Indaba le ingakhanya njengendaba yefilimu kodwa hatshi. Lokhu kuyenzakala sibili ilanga libalele endaweni yase-Epworth eHarare, lapho elinye inina elihlala lamadoda alo amabili endlini nye.
Amadoda la womabili ayaphana njalo amathuba okuthandana lomkabo.
USimbarashe Chaitezvi (28) owaziwa ngebizo lokuthi Kedha loDaniel Mapfumo (33) bahlala lonkosikazi munye uJoice Katiyo (23).
Abantu kule indawo indawo sebaqunywa umlomo.
UMapfumo ugcizelele wathi yena loChaitezvi bayazifela ngomkabo uKatiyo.
Ababili laba kubikwa bayancedisa unkosikazi wabo imisebenzi yangekhaya egoqela ukuwatsha izitshubo, ukuthanyela ngekhaya, ukugezisa imiganu, ukupheka lokunye okutshiyeneyo.
Kubikwa benza njalo umncintiswano wokusuthisa kanye lokujabulisa unkosikazi wabo.
UMapfumo onguye omdala wenza umsebenzi wokwakha kuthi uChaitezvi yena uphila ngokupheka lokuthengisa ikhobra endaweni yamabhizimusi eyakhiwa nguyise.
UKatiyo uhlala lamadoda akhe la endaweni yamabhizimusi le.
UMapfumo kubiwa sewakha kibo koMurehwa lonkosikazi wakhe lo kodwa umuzi ususiba ngamayoba ngenxa yokuthi uKatiyo wadinga enye indoda yesibili.
Ngesikhathi kuvakatshelwa imuli le ngabamaphephandaba kumaviki asanda kwedlula, kwakuloChaitezvi loKatiyo njalo indoda le yayichaya impahla ezazigoqela izitshubo zomntwana omncane.
Imuli le ilabantwana ababili; omkhulu oleminyaka emihlanu kubikwa ngokaMapfumo kuthi omncinyane ngokaChaitezvi.
Umntwana omdala kubikwa wabakhona uKatiyo engakabi lesithembo kukanti omncane wabakhona sekusesithenjini.
Exoxa lentatheli uChaitezvi uzame ukucatsha ngomunwe esithi ubabomdala (uMapfumo) uyavakatsha nje ezobona umntanakhe abahlala laye.
“Ngeke salise umuntu ukuthi azobona umntanakhe. Mina engikwaziyo yikuthi umfazi ngowami ngedwa, ubabomdala uMapfumo uhlala yedwa,” kutsho uChaitezvi.
Kusenjalo uvumile ukuthi bayezwana kakhulu loMapfumo.
“Mina yimi engaziwa kakhulu ngubabazala koMurehwa ngoba ngalobola. UMapfumo kazange akhiphe lutho.
Umntanami ngomncane owakhe ngomdala,” utshonjalo.
UKatiyo yena ovela eKasino, koMurehwa uke wazama ukwala ukuthi ulesithembo samadoda esithi wehlukana loMapfumo.
“UMapfumo ngumkami, ngake ngalotsholwa nguye kudala saba lomntwana ongumfana oleminyaka emihlanu.
Sehlukana kodwa uyabuya lapha ezotshiya ukudla komntwana kanye lemali. USimba nguye engimthandayo sesilomnyaka lenyanga eziyisificaminwe mibili sisonke, njalo sengamzalela umntwana,” kutsho uKatiyo.
“Ubaba lomama sebemazi umkhwenyana omutsha, uChaitezvi,” kutsho uKatiyo.
Inina leli lehlulekile ukuphendula umbuzo wokuthi uMapfumo wamupha isivumelwano sokwehlukana kwabo wasamukela.
Uqhubekele phambili esithi uyisekazi uVeronica Katiyo nguye okwaziyo ngendaba yakhe yamadoda amabili, ukuthi omdala wehlukana laye kudala.
UMapfumo yena oficwe zintatheli ezinathela utshwala ebhawa eseduzane utshengise ubuhlungu kakhulu.
“Le yindaba engizwisa ubuhlungu kakhulu ngoba uChaitezvi wangiphambanisa kakhulu. Kambe wangena endlini yami wathandana lomkami mina ngikhona?
“Siphekelwa ndawonye ngunkosikazi wethu sidle ndawonye, akulandaba ngoba ungaba lolaka uyalimaza umuntu ube ususiya ejele,” kutsho uMapfumo.
Ebuzwa ngendaba yokwenza imisebenzi yangekhaya uvumile kodwa esithi bayabe bencedisana.
“Mina ngiyafika nje ngisiyatshona sikwejisile kanye lobabomncane. Akukho okubi, ngiyathenga lokudla njalo izolo ngithenge inkukhu yaphekwa sadla sonke,” nguMapfumo lowo.
Izakhamizi zakule indawo ezazi ngale indaba bathi bakhathazekile ngesithembo lesi.
UMgcinisihlalo wakuWadi 7 eEpworth, uMnumzana Kingstone Tafirenyika Saunyama (63) uvumile ukuthi amadoda la asesithenjini.
“Kangikaze ngibone okunje, uJoice ulamadoda amabili ahlala lawo lapha.
“Asikwazi ukuthi simthini ngesenzo sakhe lesi. Wabuya lapha ezovakatshela udadewabo wahle wathandana loSimba ngoba wayelemali ngalezonsuku esebenzisa isigayo sikayise asithathelwa ngodadewabo abamthathela sebebone ukuthi imali yayisiqedwa ngumamalo. Indoda endala yalandela isuka eChitungwiza lapho ababehlala khona. Bahlala ndawonye,” kutsho uMgcinisihlalo lo.
Uthe bake babaxotsha ezitolo kodwa baphenduka ngemva kwesikhathi esifitshane.
“Amadoda la womabili ayamthanda umama lo njalo ayancintisana ukumupha imali. UJoice uyaziqhenya ngokuba lamadoda amabili. Lo nguye umfazi wakuleli engimaziyo olamadoda amabili. Amadoda la ayatshaywa njengabantwana abancinyane,” kuphetha uTafirenyika. — Kwayedza
Online Reporter