Balinganiselwa ku-8 million ababulewe yiCovid-19 emhlabeni

SIPHINDAPHINDEKE kathathu isibalo sabantu ababulewe yiCovid-19 emhlabeni kulaleso esisaziyo.

Lokhu kuvezwe yinhlanganiso yamazwe ebona ngezempilakahle emhlabeni iWorld Health Organisation (WHO) esithangamini labezindaba sakamuva.

Izibalo ezikhona njengamanje zithi bangu-3.4 miliyoni abantu ababulewe yileligcikwane emhlabeni selokhu sabhenduka eChina ekupheleni kuka-2019 kodwa iWHO ithi izibalo eziyizona ziphindaphindeke kathathu kulezi.

UDkt Samira Asma, osophikweni olucubungula ulwazi ku-WHO, uthe loba abanye abantu bengabulawanga yiCovid-19 ngqo kodwa bebengeke batshone aluba belungekho ubhubhane oluholele ekutheni bangakutholi ukwelatshelwa isifo abalaso base beyatshona.

“Izibalo zabatshone ngenxa yaleli gcikwane liphindaphindeke kabili noma kathathu kulokubikwe ngokusemthethweni,” kutsho uDkt Asma.

Uthe ngokombiko owenziwe yile nhlangano ngo-2020, kuvela ukuthi okungenani bangaphezulu kuka-3 miliyoni abanye abantu abatshonile ukufa kwabo okweyamaniswa leCovid-19 ngqo.

Ngaleso sikhathi izibalo ezisemthethweni zababulewe ligcikwane uthe zazikhomba ukuthi bangu- 1.8 miliyoni abatshonile.

Ebuzwa ukuthi ngabe izibalo zababulewe lubhubhane uma ehlanganisa lalabo bantu manje zithini, uphendule ngokuthi: “Ngicabanga ukuthi kuphephile ukuthi ngithi isilinganiso esiyiso kungaba ngabantu abaphakathi kuka-6 kuya ku-8 miliyoni”.

Uthe iWHO ibisebenzisana lamazwe ukuze iqonde izibalo zangempela zabantu ababulewe lubhubhane.

Uthe lokhu bebekwenzela ukuthi bazihlinzekele ezinye izimo eziphuthumayo ezingavela ngesikhathi esizayo. Uqhube wathi:” Ukungafani kolwazi kudalwe yizinto ezinengi phakathi kwazo ukusilela emuva kokushicilelwa kwababulewe ligcikwane kwamanye amazwe.

Elinye iqiniso ukuthi abanye abantu abazange bahlolwe ukuthi babulewe ligcikwane noma cha, abanye baze batshona bengazange belatshelwe lona ngoba abazange bakwazi lokufinyelela ezikhungweni zezempilo ukuze bahlolwe ngenxa yemigomo yomvalelandlini ebikhona.

Abanye babulewe ezinye izifo ngenxa yokuthi abakwazanga ukuthola ukwelatshwa ngoba kubhekenwe lobhubhane.”